Prezıdent ExxonMobil korporatsııasynyń basqarma tóraǵasyn qabyldady
ACTANA. KAZINFORM – Memleket basshysy ExxonMobil korporatsııasynyń basqarma tóraǵasy jáne bas atqarýshy dırektory Darren Výdspen kezdesti. Bul týraly Aqordanyń baspasóz qyzmeti habarlady.
Basqosý barysynda energetıka jáne munaı-gaz salalaryndaǵy ınvestıtsııalyq jobalardy júzege asyrýdyń qazirgi jaı-kúıi men perspektıvasy talqylandy.
Óz kezeginde Qasym-Jomart Toqaev ExxonMobil korporatsııasynyń el ekonomıkasyn damytýǵa qosqan úlesin joǵary baǵalady. Sondaı-aq atalǵan kompanııany Qazaqstannyń energetıka sektoryndaǵy negizgi ári senimdi seriktesteriniń biri retinde atady.
Memleket basshysy munan keıin munaı-gaz salasyndaǵy birlesken qyzmet aıasynda kómirsýtegi óndirisiniń kólemin ulǵaıtýǵa baǵyttalǵan jobalardy júzege asyrýdyń mańyzyna toqtaldy. Osy rette Qazaqstan tarapynyń atalǵan korporatsııamen yqpaldastyqty odan ári tereńdetýge jáne óndiristiń tıimdiligin arttyrýǵa múddeli ekenin aıtty.
Kezdesý sońynda Darren Výds Teńiz, Qashaǵan jáne Kaspıı qubyr konsortsıýmy jobalaryn tabysty júzege asyrýǵa qolaıly jaǵdaı jasaǵany úshin rızashylyǵyn bildirdi.