Prezıdent eýropalyq seriktesterdi Kaspıı porttaryn damytýǵa shaqyrdy

ASTANA. QazAqparat – 2030 jylǵa qaraı Transkaspıı baǵyty jyl saıynǵy ótkizý qabiletin 250-300 myń konteınerge deıin arttyrady. Bul týraly Memleket basshysy Qasym-Jomart Toqaev «Ortalyq Azııa – Eýropalyq Odaq» basshylarynyń ekinshi kezdesýinde aıtty, dep habarlaıdy QazAqparat.

«Eýropalyq Qaıta qurý jáne damý bankiniń baǵalaýynsha, 2030 jylǵa qaraı Transkaspıı baǵyty jyl saıynǵy ótkizý qabiletin 250-300 myń konteınerge deıin arttyryp, áleýetin keńeıte túsedi. Osy kórsetkishke qol jetkizý úshin tsıfrlyq sheshimder engizý jáne ınfraqurylymdy jańǵyrtý boıynsha jumys júrgizip kelemiz. Qazaqstan, Ázerbaıjan, Grýzııa jáne Túrkııa aýmaqtary boıynsha «osal jerlerdi» sınhrondy joıý jáne Transkaspıı baǵytyn damytý jónindegi jol kartasyna qol qoıyldy», - dedi Memleket basshysy.

Prezıdent eýropalyq seriktesterdi Kaspıı teńizi porttaryn damytýǵa, olardyń qyzmetin tsıfrlandyrýǵa, transporttyq kemelerdi birge óndirýge jáne logıstıkalyq qoımalar qurýǵa belsendi qatysýǵa shaqyrdy.

«Transkaspıı baǵyty boıynsha júkterdiń reversti tranzıtin damytý eýropalyq eksporttaýshylarǵa qosymsha múmkindikter beredi. Odan bólek, Qazaqstan Transkaspıı baǵytyn Transeýropalyq kólik jelisimen (TEN-T) jáne «Global Gateway» mega bastamasymen ushtastyrý boıynsha eýropalyq seriktestermen birlesip jumys isteýge daıyn. Bıyl 19 mamyrda Eýropalyq bank Eýropa men Ortalyq Azııa arasyndaǵy turaqty kólik baılanystaryna júrgizgen zertteýin usyndy. Onda Ońtústik Qazaqstan aýmaǵy arqyly ótetin «Ortalyq Transkaspıı jelisi» «eń turaqty nusqa» retinde belgilengen», - dedi Qasym-Jomart Toqaev.

Onyń aıtýynsha, «Ortalyq Transkaspıı jelisin» edáýir jaqsartý úshin ınvestıtsııaǵa jalpy ınfraqurylymdyq qajettilik 18,5 mıllıard eýroǵa baǵalanady.

«Osy aýqymdy jobalardy ushtastyrý úshin Ortalyq Azııa men Eýropalyq Odaq elderi arasyndaǵy kóliktik-logıstıkalyq yntymaqtastyqty damytý strategııasyn ázirleý usynylady», - dedi Prezıdent.