Prezıdent Eýropadaǵy qaýipsizdik jáne yntymaqtastyq uıymynyń Bas hatshysyn qabyldady
ASTANA. KAZINFORM – Memleket basshysy Óńirlik ekologııalyq sammıttiń jumysyna belsene qatysqany úshin Ferıdýn Sınırlıoǵlyǵa rızashylyǵyn bildirip, bul platforma Ortalyq Azııa men kórshi aımaqtarǵa ortaq ekologııalyq máselelerdi sheshý jolyn birlesip izdeýdi kózdeıtinin aıtty. Bul týraly Aqorda habarlady.
Qasym-Jomart Toqaev pen Ferıdýn Sınırlıoǵly ornyqty damý, klımattyń turaqtylyǵy, sý resýrstaryn tıimdi basqarý jáne ózara ekonomıkalyq baılanysty keńeıtý salalaryndaǵy yqpaldastyqty damytýǵa nıet tanytty.
Prezıdent elimiz EQYU-men barlyq úsh ólshem boıynsha yntymaqtastyqty nyǵaıtýǵa beıil ekenin rastady. Uıymmen aradaǵy seriktestik 2010 jyly ótken EQYU sammıtiniń Astana deklaratsııasy qaǵıdattaryna negizdelgenin atap ótti.
Qasym-Jomart Toqaev adam quqyqtary, demokratııa men zań ústemdigi ulttyq basymdyq retinde qarastyrylatynyna nazar aýdardy.
Prezıdenttiń aıtýynsha, elimiz Ádiletti Qazaqstan qurý jolynda aýqymdy saıası jáne ınstıtýtsıonaldyq jańǵyrý baǵdarlamasyn iske asyryp jatyr.
Jaqynda ótken referendým men jańa Konstıtýtsııanyń qabyldanýy elimizdiń saıası júıesin jańartýdaǵy mańyzdy kezeń sanalady. Qolǵa alynǵan reformalar zań ústemdigin nyǵaıtýdy, bılik ınstıtýttarynyń eseptiligin arttyrýdy jáne memleketti basqarýdyń ornyqty modelin qalyptastyrýdy kózdeıdi.
Ferıdýn Sınırlıoǵly Óńirlik ekologııalyq sammıtke shaqyrǵany úshin Qasym-Jomart Toqaevqa alǵys aıtyp, Ortalyq Azııa men odan tysqary jerlerdegi klımat jáne ekologııa kún tártibin qalyptastyrýdaǵy Qazaqstannyń róline joǵary baǵa berdi. Sonymen qatar Bas hatshy elimizdiń Uıym jumysyna erekshe úles qosyp otyrǵanyn jetkizdi.
Qasym-Jomart Toqaev pen Ferıdýn Sınırlıoǵly óńirlik jáne aımaqtyq kún tártibindegi ózekti máseleler jóninde pikir almasty.
Memleket basshysy buǵan deıin BUU-nyń joǵary ókilder tobymen kezdeskenin jazǵan bolatynbyz.
