Prezıdent: Eýropa Odaǵy — Qazaqstannyń iri saýda jáne ınvestıtsııalyq seriktesi
ASTANA. KAZINFORM — Byltyr ekijaqty taýar aınalymy shamamen 50 mıllıard dollarǵa jetti. Bul týraly Qasym-Jomart Toqaev Aqordada elimizge alǵash ret resmı saparmen kelgen Antonıý Koshtamen kezdesý barysynda aıtty, dep habarlaıdy Aqordanyń baspasóz qyzmeti.
— Al 2005 jyldan beri elimizge kelgen ınvestıtsııanyń jalpy kólemi 200 mıllıard dollarǵa jýyqtady. Eýropa Odaǵynyń Ortalyq Azııamen saýda-sattyǵynyń 80 paıyzy Qazaqstanǵa tıesili, — dedi Toqaev.
Prezıdent energetıka, kólik, tsıfrlandyrý jáne ónerkásip salalarynda qyzmet etetin 4 myńnan astam eýropalyq kompanııanyń ekonomıkamyzǵa qosqan úlesin atap ótti.
Sonymen qatar Qazaqstannyń eýropalyq bızneske turaqty ári ashyq ınvestıtsııalyq klımatty qamtamasyz etýge beıil ekenin rastady.
Qasym-Jomart Toqaev gýmanıtarlyq yntymaqtastyqqa aıryqsha nazar aýdaryp, Eýropa Odaǵynyń bilim berý baǵdarlamalaryna rızashylyǵyn bildirdi. Onyń aıasynda 5 myńnan astam qazaqstandyq stýdent pen oqytýshy Eýroodaq elderinde bilimin jetildirip, tájirıbeden ótýge múmkindik aldy.
Memleket basshysy vızalyq rejımdi jeńildetý jáne readmıssııalar týraly kelisim jasaýǵa daıyndyq jumystary bastalǵanyn quptady. Prezıdenttiń aıtýynsha, Qazaqstan Eýropa Odaǵy men Ortalyq Azııanyń S5+EO formatyndaǵy belsendi dıalogyn qýattaıdy. Atalǵan platforma ornyqty ósim jáne ózara baılanys salasyndaǵy ortaq múddelerdi ilgeriletýge jol ashty.
Memleket basshysy S5+ dıalogy aımaqty damytýdaǵy basymdyqtardy júzege asyrýdyń tıimdi tetigine aınalǵanyn jetkizdi.
Aıta keteıik, Eýropalyq Keńes Prezıdenti Antonıý Koshta Memleket basshysymen kelissóz júrgizý úshin Aqordaǵa keldi.
Osyǵan deıin Toqaev Eýropalyq Keńes Prezıdenti Antonıý Koshtamen kelissóz júrgizgeni habarlandy.