Prezıdent Euronews dırektorlar keńesiniń tóraǵasy Pedro Vargas Davıdti qabyldady
ASTANA. KAZINFORM – Kezdesýde álemniń jetekshi telearnalarynyń biri sanalatyn korporatsııamen yntymaqtastyqty keńeıtý perspektıvasy talqylandy.
Memleket basshysy Euronews ýaqıǵalardy beıtarap jarııalap, kórermenge senimdi aqparat usynatyn jahandaǵy mańdaıaldy medıa resýrs retinde tanylǵanyn atap ótti.
Qasym-Jomart Toqaevtyń aıtýynsha, telearna 2024 jyly Astanada óńirlik keńsesin ashqan sátten bastap, Qazaqstan men Ortalyq Azııanyń saıası, ekonomıkalyq jáne mádenı tynys-tirshiligi jaıynda kóbirek habar tarata bastady.
Prezıdent Euronews arnasynyń qazaq tilinde jańalyq taratýdy qolǵa alǵanyn quptap, muny ózara tıimdi yqpaldastyqtyń jarqyn kórinisi dep atady.
Pedro Vargas Davıd medıa jeliniń qoldanysyna Ortalyq Azııa halyqtarynyń arasynan alǵash ret qazaq tili engenin málimdedi.
Budan bólek, Euronews jetekshisi qazaqstandyqtardy jańa Konstıtýtsııanyń qabyldanýymen quttyqtap, Negizgi zańda kórinis tapqan qaǵıdattar men qundylyqtar el basshylyǵynyń anaǵurlym kúshti ári ozyq memleket qurýǵa beıil ekenin kórsetetinin jetkizdi.
Sonymen qatar Qazaqstan Prezıdentiniń taıaýda Brıýsselge jasaǵan resmı saparynyń nátıjeleri jóninde pikir almasý ótti.
Pedro Vargas Davıd Prezıdent Qasym-Jomart Toqaevtyń sapar qarsańynda Euronews saıtynda jaryq kórgen maqalasyndaǵy Astana men Eýropalyq odaqtyń keńeıtilgen strategııalyq seriktestiginiń keleshegi týraly túıindi oılaryn eýropalyq aýdıtorııa erekshe yqylaspen qabyldaǵanyn aıtty.
Eýropa sarapshylarynyń pikirinshe, Eýropalyq Odaq pen Qazaqstan arasyndaǵy qarym-qatynas joǵary qarqynmen damyp, uzaqmerzimdi ári jemisti yntymaqtastyqtyń buryn-sońdy bolmaǵan sıpatyna ıe bolǵan.
Áńgimelesý barysynda aımaqty jahandyq aqparat keńistigine shyǵaryp, Qazaqstannyń jetistikterin halyqaralyq qoǵamdastyqqa keńinen tanystyrýǵa múmkindik beretin birlesken bastamalardy júzege asyrý máseleleri qarastyryldy.
