Prezıdent Eýrazııalyq damý bankiniń basqarma tóraǵasyn qabyldady
ASTANA. KAZINFORM — Prezıdentke halyqaralyq qarjy ınstıtýtynyń jumys nátıjesi men aldaǵy jospary jóninde baıandaldy. Bul týraly Aqordanyń baspasóz qyzmeti habarlady.
Eýrazııalyq damý banki (EADB) Qazaqstan ekonomıkasyna byltyr 1,4 mıllıard dollar qarjy salǵan, al ınvestıtsııa portfelindegi qazaqstandyq jobalardyń úlesi 60 paıyzǵa jetken.
Qazaqstan Respýblıkasy boıynsha 2022-2026 jyldarǵa arnalǵan strategııa aıasynda atalǵan bank elimizge 3,8 mıllıard dollar ınvestıtsııa quıýdy josparlaǵan bolatyn. Qasym-Jomart Toqaevqa bul meje merziminen buryn oryndalǵany týraly málimet berildi. Bıyl bankke jalpy somasy 4,5 mıllıard dollardan asatyn jobalar usynyldy. Eýrazııalyq damý banki energetıkalyq nysandardy jańǵyrtý jáne jańartylatyn energııa kózderin, kólik jáne logıstıka salalaryn damytý baǵyttaryna, sonyń ishinde respýblıkalyq mańyzy bar joldardy jóndeýge, ınfraqurylym nysandary qurylysyna, ónerkásip jáne tsıfrlyq tehnologııalarǵa qatysty jobalarǵa 1 mıllıard dollardan astam ınvestıtsııa salýdy kózdep otyr.
Nıkolaı Podgýzovtyń aıtýynsha, EADB seriktestermen jáne kópjaqty uıymdarmen tyǵyz qarym-qatynasta jumys istep, sondaı-aq ózderi uıymdastyratyn halyqaralyq is-sharalar arqyly Qazaqstannyń qarjy naryǵyn damytý jáne ınvestıtsııa tartý isine belsendi atsalysýǵa nıetti.
Memleket basshysy banktiń Qazaqstan ekonomıkasyn damytýǵa qosqan úlesin joǵary baǵalap, yntymaqtastyqty odan ári nyǵaıtýǵa beıil ekenin rastady.
Eýrazııalyq damý banki – ınvestıtsııalyq qyzmetin Eýrazııa keńistiginde júrgizetin kópjaqty damý banki. Onyń shtab-páteri Almaty qalasynda ornalasqan. 2025 jyly EADB portfeline jalpy ınvestıtsııa somasy 16,5 mıllıard dollar bolatyn 305 joba endi. Bank óz jumysynda kólik ınfraqurylymy, tsıfrlandyrý, jasyl energetıka, aýyl sharýashylyǵy, ónerkásip jáne mashına jasaý salalaryndaǵy ıntegratsııaǵa tıimdi áser etetin jobalarǵa basymdyq beredi.
Aıta ketelik keshe Prezıdent Chevron kompanııasymen uzaq merzimdi yntymaqtastyqty tereńdetýge daıyn ekenin aıtqan edi.