Prezıdent Eýrazııalyq damý bankiniń basqarma tóraǵasy Nıkolaı Podgýzovty qabyldady
ASTANA. KAZINFORM – Memleket basshysyna bank jumysynyń nátıjeleri men aldaǵy kezeńge arnalǵan jospary jóninde málimet berildi. Nıkolaı Podgýzovtyń aıtýynsha, Eýrazııalyq damý bankiniń Qazaqstan ekonomıkasyna salatyn jyl saıynǵy ınvestıtsııasy eki jyl qatarynan 1 mıllıard dollardan asyp otyr.
Qasym-Jomart Toqaevqa banktiń 2022-2023 jyldardaǵy ınvestıtsııasynyń jyldyq kóleminiń jalpy somasy 4,2 mıllıard dollardy quraǵany týraly baıandaldy. Bul Strategııada bekitilgen 2022-2026 jyldarǵa arnalǵan jospardan shamamen 1,5 ese kóp. Ótken jyldyń qorytyndysy boıynsha bul kórsetkish 59 paıyzdy qurady.
Prezıdentke berilgen málimetke sáıkes Qazaqstandaǵy áleýetti jobalarǵa bólý úshin banktiń 2024 jylǵa qarastyryp otyrǵan qarjy kólemi 3,5 mıllıard dollardan asady. Investıtsııany, eń aldymen, kólik ınfraqurylymy, jylý energetıkasy, jańartylatyn energııa kózderi, ónerkásip, agroónerkásip jáne sý resýrstary sııaqty strategııalyq mańyzdy salalarǵa salý josparlanyp otyr.
Nıkolaı Podgýzovtyń aıtýynsha, bıyl bank Qazaqstannyń qarjy naryǵyn damytý jáne ınfraqurylymdyq jobalardy qarjylandyrýdyń jańa quraldaryn engizý isine atsalysýǵa nıetti.
Sonymen qatar Eýrazııalyq damý banki tóraǵasy Memleket basshysyna Ortalyq Azııanyń sý-energetıka salasyna jasalǵan zertteý nátıjelerin tanystyrdy. Bank Qazaqstannyń sý resýrstaryn tıimdi paıdalanatyn elderdiń kóshbasshysy retinde qalyptasýyna yqpal etýge nıetti. Sondaı-aq sýdy únemdeıtin jáne energetıkalyq turǵydan tıimdi tehnologııalar boıynsha aımaqtyq saraptama ortalyqtaryn damytý úshin 10 mıllıon dollarǵa deıin granttyq qarjy bólýge daıyn. Buǵan qosa, sýdy esepke alýdyń tsıfrlyq tehnologııalaryn, sýarmaly jerlerge tolyqtaı lazerlik josparlaý tásilin engizýge jáne zamanaýı ırrıgatsııalyq qural-jabdyqtar óndiretin óńirlik óndiristik-servıstik klaster qurýǵa baǵyttalǵan jobalarǵa 400 mıllıon dollarǵa deıin qarjy bólmek.
Memleket basshysy bıyl jazda Almaty qalasynda Eýrazııalyq damý bankiniń jyldyq qorytyndy jınalysyn jáne iskerlik forýmyn uıymdastyrý máselesin quptaıtynyn jetkizdi. Atalǵan forýmnyń kún tártibinde Ortalyq Azııanyń sý-energetıka keshenine, kólik júıesi qurylymy men qarjy quraldaryn damytýǵa qatysty máseleler qamtylady. Sonymen qatar Qasym-Jomart Toqaev elimizde bank qoldaý bildirgen ınfraqurylymdyq jobalardyń mańyzdy ekenin aıtty.