Prezıdent Eýrazııalyq damý bankiniń basqarma tóraǵasy Nıkolaı Podgýzovty qabyldady
ASTANA. KAZINFORM – Kezdesý barysynda Eýrazııalyq damý bankiniń keıingi 20 jylda atqarǵan jumys nátıjesi jáne ınvestıtsııalyq yntymaqtastyqty keńeıtý perspektıvasy talqylandy. Bul týraly Aqordanyń baspasóz qyzmeti habarlady.
Memleket basshysy qarjy ınstıtýtynyń negizi qalanǵanyna 20 jyl tolýymen quttyqtady.
Qasym-Jomart Toqaev Eýrazııalyq damý banki strategııalyq mańyzy bar jobalardy iske asyrýda Qazaqstannyń basty seriktesteriniń biri ekenine nazar aýdardy.
Nıkolaı Podgýzov Memleket basshysyna EADB boljamyn tanystyrdy. Soǵan sáıkes, bıyl elimizdiń ishki jalpy óniminiń ósimi 5,5 paıyzdan kem bolmaıdy. Buǵan ınvestıtsııanyń qarqyny, aýqymdy ınfraqurylymdyq baǵdarlamalar, sondaı-aq ishki suranys pen áleýmettik kórsetkishterdiń turaqtylyǵy áser etedi.
Prezıdentke banktiń 2022-2026 jyldar aralyǵynda júzege asyrǵan strategııasy aıasynda jalpy ınvestıtsııa kólemi 9,2 mıllıard dollarǵa jetkeni jóninde málimet berildi. Qazaqstan ekonomıkasyna 5,2 mıllıard dollar qarjy quıyldy. Bul – banktiń ótken 15 jylda salǵan ınvestıtsııasymen parapar.
Atap aıtqanda, 2,1 mıllıard dollar ónerkásipti damytýǵa, 1 mıllıard dollar energetıka salasyna, 1 mıllıard dollar kólik ınfraqurylymyna, 1,1 mıllıard dollar qarjy sektoryna baǵyttaldy. Tsıfrlandyrýdy damytýǵa jáne jasandy ıntellekt tehnologııasyn engizýge aıryqsha mán berilip otyr.
Memleket basshysy qarjy ınstıtýty qyzmet kórsetetin aımaqtardyń aıtarlyqtaı keńeıgenin atap ótti. Prezıdenttiń pikirinshe, bul jańa bastamalardy iske asyryp, óńirlik ekonomıkalyq ıntegratsııany nyǵaıtýǵa yqpal etedi.
Kezdesý sońynda Qasym-Jomart Toqaev pen Nıkolaı Podgýzov Qazaqstan ekonomıkasyn ornyqty damytý maqsatynda strategııalyq seriktestik pen ınvestıtsııalyq yntymaqtastyqty odan ári arttyrýǵa nıetti ekenin rastady.
Eske sala keteıik, buǵan deıin Buharada Qasym-Jomart Toqaev pen Shavkat Mırzıeev beıresmı kezdesý ótkizetinin habarlaǵan edik.
