Prezıdent: Estonııanyń Qazaqstan ekonomıkasyna quıǵan ınvestıtsııasy 128 mıllıon dollardan asty
ASTANA. KAZINFORM — Kezdesý barysynda memleketter basshylary ekonomıkalyq yqpaldastyqtyń basym baǵyttaryn talqylady. Bul týraly Aqordanyń baspasóz qyzmeti habarlady.
Atap aıtqanda, taraptar saýda-ınvestıtsııa, tsıfrlandyrý, jasandy ıntellekt, kólik-logıstıka, ónerkásip kooperatsııasy, aýyl sharýashylyǵy, asa mańyzdy mıneraldar jáne bilim-ǵylym salalaryndaǵy yntymaqtastyq máselelerin qarastyrdy.
Qasym-Jomart Toqaev Estonııa Qazaqstannyń Eýropa Odaǵyndaǵy senimdi seriktesi ekenine nazar aýdardy.
– Bul sapar eki memleket arasyndaǵy ózara tıimdi áriptestiktiń jańa kezeńine jol ashady. Elińizdi Baltyq óńirindegi, sondaı-aq Eýropa Odaǵyndaǵy óte mańyzdy seriktes retinde qarastyramyz. Estonııa ınnovatsııalyq jáne órkendegen memleket qurý jolynda tańǵalarlyq tabysqa jetti. Sizdiń elińiz tsıfrlyq júıege negizdelgen memleket, úkimet jáne qoǵam qurý isinde kósh bastap tur. Sondaı-aq ashyqtyqty qamtamasyz etý, azamattardy el basqarý isine tartý boıynsha kópke úlgi. Biz Estonııanyń zań men tártip qaǵıdatyn ustanýǵa, bilim berý deńgeıin arttyrýǵa jáne ornyqty damýǵa beıildiligin joǵary baǵalaımyz, – dedi Qazaqstan Prezıdenti.
Memleket basshysy ekijaqty yqpaldastyqtyń oń qarqynmen damyp kele jatqanyna toqtalyp, Qazaqstan men Estonııa barlyq baǵyt boıynsha jan-jaqty baılanys ornatqanyn jetkizdi. Eki el arasyndaǵy saıası dıalog ashyq ári syndarly sıpatta órbip, ózara túsinistikti nyǵaıtýda parlamentaralyq yntymaqtastyq mańyzdy ról atqaryp otyr.
Prezıdenttiń aıtýynsha, Qazaqstan men Estonııa halyqaralyq uıymdar aıasyndaǵy yqpaldastyqty jolǵa qoıǵan.
Negizgi óńirlik jáne jahandyq máselelerde, sonyń ishinde beıbitshilikti, turaqtylyq pen ornyqty damýdy qamtamasyz etýde ustanymdary uqsas. Kezdesýde ózara qarym-qatynastyń mańyzdy baǵyttarynyń biri sanalatyn ekonomıkalyq yntymaqtastyqqa basa mán berildi.
Prezıdent Estonııanyń 2005 jyldan beri Qazaqstan ekonomıkasyna quıǵan tikeleı ınvestıtsııasy 128 mıllıon dollardan asqanyn atap ótti. Qazir elimizde 80-nen astam estonııalyq kompanııa logıstıka (CF&S Kazakhstan LLP), poshta qyzmetteri (Omniva) jáne tsıfrlyq servıs (Bolt) salalarynda tabysty jumys istep jatyr.
Memleket basshysynyń pikirinshe, Estonııadan úlken bıznes-delegatsııanyń kelýi Tallınniń seriktestik aıasyn odan ári keńeıtý nıetin tanytady. Qazaqstan estonııalyq kompanııalarǵa jan-jaqty qoldaý kórsetýge daıyn.
Qasym-Jomart Toqaev mádenı-gýmanıtarlyq baılanysty tereńdetý Qazaqstan men Estonııa arasyndaǵy dostyqty nyǵaıtýǵa tyń serpin beredi dep sanaıdy.
Prezıdent ǵylym-bilim salasy ekijaqty yntymaqtastyqtyń eń perspektıvti baǵyty bolyp qala beretinin aıtty.
Alar Karıs Qazaqstandy Estonııanyń Ortalyq Azııadaǵy eń mańyzdy ekonomıkalyq seriktesi dep atady.
– Estonııa Qazaqstan men Eýropa Odaǵy naryqtary arasynda qýana-qýana dáneker bolady. Estonııa bıznes ókilderi Siz atap ótken tranzıt jáne logıstıka salasynan bólek, Qazaqstannyń basqa da sektorlaryna ınvestıtsııa salýǵa ázir. Bıznes-delegatsııamyzdyń quramynda 40 kompanııa bar. Olar logıstıka, tranzıt, aqparattyq-kommýnıkatsııalyq tehnologııalar, kıberqaýipsizdik, sondaı-aq bilim jáne ǵylym salalarynda qyzmet kórsetedi. Eýropa Odaǵynyń múshesi retinde Estonııa Ortalyq Azııanyń, onyń ishinde aımaqta kósh bastap turǵan Qazaqstannyń EO-men strategııalyq serikteske aınalǵanyna qýanady. Atap aıtqanda, EýroOdaq Global Gateway jobasy aıasynda kólik jáne óńiraralyq baılanys salasyndaǵy qatynastardy nyǵaıtýǵa nıetti, – dedi Estonııa Prezıdenti.
Kezdesý sońynda Qasym-Jomart Toqaev elimizge saparmen kelgeni úshin Alar Karıske rızashylyǵyn bildirip, búgingi kezdesýdi shynaıy dostyqtyń nyshany ári ózara yntymaqtastyqty tereńdetýdiń múmkindigi retinde qarastyratynyn málimdedi.
Aıta keteıik, Aqordada Memleket basshysy Qasym-Jomart Toqaev elimizge memlekettik saparmen kelgen Estonııa Prezıdenti Alar Karısty qarsy alǵan edi.
Qazaqstan Estonııany Baltyq óńirindegi mańyzdy áriptes retinde qarastyrady.