Prezıdent Esil ózeni arqyly ótetin jańa kópirdi aralap kórdi
Memleket basshysy kópirdiń tehnıkalyq-paıdalanýshylyq sıpattamalarymen tanysty.
Atyraý oblysynyń ákimi N.Noǵaev Nursultan Nazarbaevqa kópirdiń saıabaq aımaǵyndaǵy jaıaý júrginshiler legi men velosıped jelisin Esil ózeniniń oń jaǵalaýymen jalǵaıtynyn baıandady.
«Eger kópirge joǵarydan qaraıtyn bolsaq, onyń pishini Atyraý oblysynyń sımvoly sanalatyn balyqqa uqsaıtynyn kórýge bolady», - dedi oblys ákimi.
Qazaqstan Prezıdenti jańa kópir Atyraý oblysynyń laıyqty tartýy ekenin jáne onyń elorda turǵyndary men qonaqtaryna uzaq jyldar boıy qyzmet etetinin atap ótti.
«Astanalyqtar bul nysandardy daıyndaýǵa atsalysqan barlyq óńirlerimizge alǵys aıtýǵa tıis. Bas qalany búkil el bolyp turǵyzdyq jáne búkil el qýanyshqa kenelýi kerek», - dedi Memleket basshysy.
Sonymen qatar, Astana qalasynyń ákimi Á.Isekeshev Nursultan Nazarbaevqa jalpy uzyndyǵy 56 shaqyrym bolatyn velosıped kóliginiń ınfraqurylym nysandaryn tanystyrdy. Velosıped joly Esil ózeniniń boıy men sol jaǵalaýy jáne EKSPO kesheniniń nysandary arqyly ótedi. Ol qalalyq saıabaqtaǵy shańǵy jáne rolıkke arnalǵan joldar men Ilınka kentinen «jasyl beldeý» arqyly ótetin velosıped jolaqtaryn baılanystyrady. Velotrekter arnaıy ústelderi jáne velosıped qoıatyn oryndary bar, wi-fi jáne telefondy zarıadtaý múmkindigi qarastyrylǵan «aqyldy ınfraqurylymmen» jabdyqtalǵan.
Shara sońynda ashyq aspan astyndaǵy amfıteatr sahnasynda Atyraý oblysy fılarmonııasynyń ártisteri men óner ujymy uıymdastyrǵan «Uly dala júregi - Astanama» atty teatrlandyrylǵan kontserttik baǵdarlama kórsetildi.
***
Kópirdiń dızaıny sáýlet óneriniń álemdik úrdisine sáıkes keledi. Onyń syrt kelbeti zamanaýı úlgige saı, al jaıaý júrginshilerge arnalǵan ishki jaǵy jaryq pen kóleńkeniń qyzyqty kórinisin beıneleıdi.
Nysannyń jalpy uzyndyǵy - 313,5 metr, eni - 10,5 metr. Kópirde jaıaý júrginshilerge arnalǵan alty metrlik jolaq, velosıpedshilerge arnalǵan úsh metrlik jolaq, sondaı-aq eni 0,5 metr bolatyn qaýipsizdik jolaǵy jáne 0,5 metrlik sharbaqty qorshaýǵa arnalǵan eki jolaq bar. Kópir jabyndysy úshin lıtakrıl paıdalanylǵan. Bul nysan aýa raıy jaǵdaıy eskerile otyryp salynǵan. Ony jobalaǵanda jeldiń áseri de esepke alynǵan. Salmaǵy - 1920 tonna.
Velosıpedshiler men jaıaý júrginshilerge arnalǵan kópirdi jáne velosıped ınfraqurylymyn «Óńirlerdiń Astanaǵa tartýy» jobasy aıasynda Atyraý, Túrkistan, Soltústik Qazaqstan, Pavlodar, Qostanaı, Aqmola jáne Jambyl oblystarynyń ákimdikteri turǵyzdy.
