Prezıdent erekshe kútimdi qajet etetin balalar máselesine nazar aýdardy

TARAZ. KAZINFORM - Memleket basshysy Jambyl oblysy turǵyndarymen kezdesýi barysynda barlyq óńirde Inklıýzıvti sport ortalyǵyn salý týraly tapsyrma berdi,dep habarlaıdy Aqordanyń baspasóz qyzmeti.

- Memleket erekshe kútimdi qajet etetin balalar máselesine aıryqsha mán beredi. Keshe men Astanadaǵy Inklıýzıvti sport ortalyǵynda boldym. Sondaı ortalyqtardy elimiz boıynsha basqa aımaqtarda salý qajet dep sanaımyn. 

Úkimetke ákimdermen birlesip, bul máseleni jan-jaqty pysyqtap, shuǵyl sharalar qabyldaýdy tapsyramyn. Shyn máninde, mundaı nysandardyń tek elordada ǵana bolǵany durys emes, árbir oblysta salý kerek. 

Bul ákimderdiń jumysyndaǵy olqylyq dep aıtýǵa bolady. Biz – áleýmettik memleketpiz. Sondyqtan áleýmettik mindettemelerdi oryndaý árdaıym elimizdiń aıryqsha nazarynda turatyn másele. Bıyl zeınetaqy jáne járdemaqy tóleýge 5,9 trıllıon teńge bólindi. Kelesi jyly bul kórsetkish taǵy 10 paıyzǵa ósedi,- dedi Memleket basshysy.

Aıta keteıik, Memleket basshysy Jambyl oblysynda jumys saparymen júr. Prezıdent onda birqatar ónerkásiptik jáne áleýmettik nysandardy aralap kórdi.