Prezıdent: Erekshe darynyńyz elimizdiń mádenı-rýhanı baılyǵyn arttyrýǵa úlken úles qosty
ASTANA. KAZINFORM — Memleket basshysy ánshi Tolqyn Zabırovany mereıtoıymen quttyqtady, dep habarlaıdy QR Mádenıet jáne aqparat mınıstrliginiń baspasóz qyzmeti.
Elordadaǵy Beıbitshilik jáne kelisim saraıynda Qazaqstannyń eńbek sińirgen qaıratkeri, tanymal estrada jáne opera ánshisi Tolqyn Zabırovanyń «Ómirge ǵashyqpyn» atty mereıtoılyq kontserti ótti.
Saltanatty keshke QR Mádenıet jáne aqparat mınıstri Aıda Balaeva qatysty. Mınıstr Memleket basshysy Qasym-Jomart Toqaevtyń quttyqtaýyn jetkizdi. Prezıdent óz quttyqtaýynda ánshini otandyq ónerdiń eń jarqyn ókilderiniń biri, erekshe daýys ıesi retinde atap ótti.
— Siz áıgili otandyq jáne álemdik operalyq týyndylar men lırıkalyq ánderdi sheber oryndap, kórermenniń ystyq yqylasyna bólenip júrsiz. Erekshe tabıǵı darynyńyz jáne tynymsyz eńbegińiz arqyly elimizdiń mádenı-rýhanı baılyǵynyń órisin keńeıtýge qosqan úlesińiz óte mol. Kemel bilimińiz ben boıyńyzdaǵy asyl qasıetterińizben zamandastarymyzdyń ortasynda syı-qurmetke bólenip júrsiz, — delingen Memleket basshysynyń quttyqtaý hatynda.
Tolqyn Zabırova — kórkemdik talǵamy men kásibı biliktiligi joǵary óner ıesi.
Atalmysh kontsertte ánshiniń eń úzdik avtorlyq, zamanaýı jáne álemdik hıt ánder oryndaldy. Atap aıtsaq, «Vechnaıa lıýbov», «Adagio», «Per Amore, Per te», «Qara, maǵan qara», «Ómirge ǵashyqpyn», «Sen úshin», «Bulbul áni», «Júrek (Cover Show)», «Saǵyna beremin (Cover Show)» jáne basqa da týyndylar shyrqaldy.
2024 jyly Tolqyn Zabırova «Parasat» ordenimen marapattaldy.
Budan buryn Prezıdent «Habar» agenttigin 30 jyldyq mereıtoıymen quttyqtaǵanyn habarlaǵan edik.