Prezıdent Erdoǵan: Izraıl ashtyqty qarý retinde paıdalanyp otyr

ASTANA. KAZINFORM – Izraıl ashtyqty qýatty joıǵysh qarý retinde paıdalanyp otyr, ásirese balalarǵa qatysty. Bul týraly Túrkııa prezıdenti Rejep Taıyp Erdoǵan Ystanbulda 31 qazan, juma kúni ótken TRT World halyqaralyq forýmynda sóılegen sózinde málim etti, dep habarlaıdy Anadoly.

Túrkııa basshysynyń sózinshe, kóptegen máselelerdiń sheshilip jatqanyna qaramastan álemniń túrli aımaqtarynda adamdar ólip jatyr.

-Izraılde ıadrolyq qarý men eń qýatty bombalar bar. Olar kez kelgen ýaqytta Gaza sektoryna soqqy bere alady. Endeshe olar qalaı kinásiz dep tanylady?, -degen saýal qoıdy Erdoǵan.

Túrkııa basshysy Izraıldiń ashtyqty joıǵysh qarý retinde, ásirese balalarǵa qatysty paıdalanyp otyrǵanyn jetkizdi. Osy rette ol buqaralyq aqparat quralynyń 270 qyzmetkeri ómirin qaýipge tige otyryp, álemge onda ne bolyp jatqanyn oqıǵa ornynan kórsetýge tyrysqanyn aıtty. Alaıda olar ótirikke negizdelgen Izraıl saıasatynyń kesirinen óltirildi.

Prezıdent sonymen qatar Gaza sektorynda bútin ǵımarat qalmaǵanyn jetkizdi. Mektep, aýrýhanadan bastap shirkeýge deıin bári bombalandy.

Erdoǵan halyqaralyq uıymdardy áreketsizdigi úshin aıyptap, qantógisti toqtatý men balalardy qorǵaý úshin eshqandaı tıimdi shara qolǵa alynbaǵanyn aıtty.

Memleket basshysy HAMAS-tyń kelisim talaptaryn naqty ustanyp otyrǵanyn, al Izraıl bolsa, kelisimdi buzyp, zorlyq-zombylyqty jalǵastyrýǵa umtylyp otyrǵanyn atap ótti.

-Izraıldiń sózinde turý jaǵyna kelgende jaǵdaıynyń qanshalyqty múshkil ekenin bári biledi,-dedi Túrkııa basshysy.

Prezıdent Túrkııanyń Gazany qalpyna keltirýge barynsha daıyn ekenin aıtty.

-Túrkııa tek kómek kórsetip qana qoımaı, Gazany qalpyna keltirýge bilek sybana kirisýge daıyn,- dedi Prezıdent.

Osyǵan deıin Túrkııa Izraıldi Gazadaǵy atysty toqtatý rejımin saqtaýǵa shaqyrǵan bolatyn.