Prezıdent Eńbek kúnimen quttyqtady
ASTANA. KAZINFORM — Qazaqstan Respýblıkasynyń Prezıdenti Qasym-Jomart Toqaev Qazaqstan halqyn Eńbek kúnimen quttyqtady. Bul týraly Aqordanyń baspasóz qyzmeti habarlady.
Qurmetti otandastar!
Eńbek kúni qutty bolsyn!
Bul merekeniń elimiz úshin aıryqsha máni bar. Sebebi, eńbek pen eńbekqorlyq – ulttyq ıdeologııamyzdyń arqaýyna aınalǵan qundylyqtar.
Jumysshy mamandyqtary jylynda biz adal ári qajyrly eńbegimen elimizdiń ósip-órkendeýine úles qosyp jatqan san alýan kásip ıeleri men túrli býyn ókilderine jáne elimizdegi barsha eńbekker qaýymǵa syı-qurmet kórsetemiz.
Men elimizdiń qundylyqtary men maqsattaryna zor senimmen qarap, qasterli Otanymyz úshin aıanbaı eńbek etip júrgen, árdaıym kásibı sheberligin shyńdap, óndiriste joǵary kórsetkishke qol jetkizýge umtylatyn jáne ár iste alǵyrlyq pen jańashyldyq tanytatyn otandastarymyzǵa shynaıy rızashylyǵymdy bildiremin.
Biz qoǵamda adal eńbekti keńinen dáriptep, óskeleń urpaqty eńbekqor etip tárbıeleı otyryp, Qýatty ári Ádiletti Qazaqstannyń myzǵymas negizin qalaımyz. Jaýapkershiligi joǵary, nıeti taza, otanshyl azamattarymyzdyń arqasynda biz damyǵan jáne órkenıetti el bolý mindetin abyroımen oryndaımyz dep senemin.
Qazaqstannyń barlyq azamattaryna zor densaýlyq, baq-bereke jáne tolaǵaı tabys tileımin! – delingen quttyqtaý mátininde.
Aıta keteıik, Oljas Bektenov Prezıdent atynan jumysshy mamandyqtary ókilderine marapat tabystady.