Prezıdent «Eńbek alleıasynda» eńbek adamdarymen júzdesti

Prezıdent Qyzylorda oblysyna sapary barysynda byltyr boı kótergen «Eńbek alleıasynda» eńbek adamdarymen júzdesti, dep habarlaıdy Kazinform agenttigi Aqordanyń resmı saıtyna silteme jasap.

Memleket basshysy Qyzylorda oblysynyń damýyna basa mán beretinin atap ótti. Sondaı-aq kúrdeli geosaıası ahýal kezeńinde Qazaqstannyń órkendeýi jolynda elimizdi birlik tanytyp, eńbek etýge shaqyrdy.

– Shyn máninde, eńbek adamdary halqymyz úshin eń qajet azamattar. Eń aldymen, biz eńbek adamdaryna qurmet kórsetýimiz kerek. Sizder osy aq kúrishtiń atasy – Ybyraı Jaqaevtyń jolyn jalǵap júrsizder. Sondyqtan men sizderdi qoldaımyn,– dedi Memleket basshysy.

Dıqandar aýyl sharýashylyǵynyń damýyna aıryqsha mán berip, memleket tarapynan qoldaý sharalaryn kóbeıtkeni úshin Prezıdentke alǵys aıtty. Ásirese, Sý resýrstary mınıstrligin qurý jónindegi jańalyqty syr boıynyń dıqandary qýana qabyldaǵanyn jetkizdi. Sonymen qatar olar aýylda jastarǵa jaıly jaǵdaı jasalǵanyna, jas mamandardyń el ishinde qyzý eńbek etip jatqanyna toqtaldy.

Qasym-Jomart Toqaev jastarymyzdyń eńbekqor, uqypty, otansúıgish bolýy kerek ekenin jáne olarǵa árqashan qoldaý kórsetiletinin atap ótti.

– Aýylda jastardyń jumys isteýine, ómir súrýine qolaıly jaǵdaı jasalǵan. Osyndaı aýyldardy kóbeıtýimiz kerek. Oǵan shamamyz da, qarajatymyz da jetedi. Kásipkerlermen kezdeskenimde eldi mekenderge qarjy salyp, kómektesý kerek dep únemi aıtyp kelemin. Naǵı Іlııasov basqa aýyldarǵa da úlgi bolýy qajet. Sondyqtan ózge oblystar da aýyldardy osylaı damytady dep oılaımyn,– dedi Memleket basshysy.