Prezıdent eń tómengi kúnkóris shegin halyqtyń naqty shyǵystaryna sáıkestendirýdi júktedi
ASTANA. QazAqparat - QR Prezıdenti Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» dep atalatyn óziniń bıylǵy Joldaýynda eń tómengi kúnkóris shegin qaıta qaraýdy, ony qazaqstandyqtardyń naqty tutynýshylyq shyǵystaryna sáıkestendirýdi tapsyrdy, dep habarlaıdy QazAqparat.
«Meniń tapsyrmam boıynsha 2017 jylǵy 1 shildeden bastap 2,1 mıllıon zeınetker úshin zeınetaqy 2016 jylǵy deńgeıden 20%-ǵa deıin arttyrylady.
Budan bólek, bazalyq zeınetaqy taǵaıyndaý 2018 jylǵy 1 shildeden bastap jańa ádisteme boıynsha júzege asyrylady. Onyń kólemi zeınetaqy júıesine qatysý ótiline baılanysty belgilenedi.
Osy ósimniń barlyǵy 2018 jyly bazalyq zeınetaqynyń jańa mólsherin 2017 jylmen salystyrǵanda 1,8 ese arttyrýǵa múmkindik beredi», - dedi Elbasy.
Memleket basshysy atap ótkendeı, elimizde jyl saıyn 400 myńǵa jýyq bala dúnıege keledi, bul - 1999 jylǵy deńgeıden 2 ese derlik joǵary jáne mundaı jaqsy úrdisti aldaǵy ýaqytta da saqtaý kerek.
«Meniń tapsyrmam boıynsha 2017 jylǵy 1 shildeden bastap bala týǵanda beriletin bir rettik járdemaqy kólemi 20%-ǵa ósiriledi.
Eń tómengi kúnkóris shegin de qaıta qarastyrý kerek. Ol qazaqstandyqtardyń naqty tutynýshylyq shyǵystaryna sáıkes kelýge tıis. Bul qadam 2018 jylǵy 1 qańtardan bastap bazalyq zeınetaqy, múgedekterge jáne asyraýshysynan aırylǵan otbasylarǵa arnalǵan járdemaqy, múgedek bala tárbıelep otyrǵandarǵa beriletin ataýly kómek pen járdemaqy kólemin 3 mıllıon adam úshin ósirýge múmkindik beredi», - dedi N.Nazarbaev.
Joldaýda júktelgen tapsyrmaǵa sáıkes, 2018 jylǵy 1 qańtardan bastap ataýly áleýmettik kómek kórsetý shegi eń tómengi kúnkóris sheginiń 40%-ynan 50%-ǵa deıin arttyrylyp, onyń jańa formaty engiziletin bolady. Bul rette jumys isteýge qabiletti adamnyń bári tek jumyspen qamtý baǵdarlamasyna qatysý sharty arqyly ǵana qoldaýǵa ıe bolýǵa tıis.
