Prezıdent: El ishine iritki salǵysy keletinder zańǵa sáıkes qatań túrde jaýapqa tartylady

ASTANA. KAZINFORM — Bıyl alǵash ret mektepke baratyn balalardyń 70 paıyzdan astamy qazaq tilinde oqıtyn bolady. Bul týraly Qazaqstan halqy Assambleıasynyń HHHІV sessııasynda Memleket basshysy Qasym-Jomart Toqaev aıtty.

— Búginde túlekterdiń 80 paıyzǵa jýyǵy Ulttyq biryńǵaı testileýdi memlekettik tilde tapsyrady. Bıyl alǵash ret mektepke baratyn balalardyń 70 paıyzdan astamy qazaq tilinde oqıtyn bolady. Árıne, elimizde azamattar bir-birin nemese minberde sóılep turǵan adamdy «myna tilde sóıle» dep májbúrlemeýge tıis. Til máselesin tý etip qoǵamda alaýyzdyq týǵyzǵysy keletin, el ishindegi jaǵdaıdy shıelenistirýge umtylatyn árbir áreketke tosqaýyl qoıylyp, zań júzinde jazalanady. Bul rette úı ishindegi ǵana emes, shetelde otyryp áldebir uıymdardyń aqshasy men tapsyrmasyna destrýktıvti áreketpen aınalysatyn arandatýshylar týraly da aıtyp otyrmyz, — dedi Qasym-Jomart Toqaev.

Prezıdent byltyr Ulttyq quryltaı otyrysynda birlik, otanshyldyq, táýelsizdik jáne kelisim memleketimizdiń negizgi qundylyqtary dep atap kórsetkenin eske saldy.

— Bári de osy qundylyqtardan bastalady. Sondyqtan osy jerde taǵy da qaıtalap aıtqym keledi: halqymyzdyń tatýlyǵyn buzyp, el ishine iritki salǵysy keletinder zańǵa sáıkes qatań túrde jaýapqa tartylady, tıisti jazasyn alady. Al yntymaq pen birlikti nyǵaıtýǵa úles qosqan azamattar árdaıym zor qurmetke ıe bolady, — dedi Memleket basshysy.

Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.

Osyǵan deıin Prezıdent Qazaqstanda adamdy ultyna, tiline, dinine qaraı kemsitý eshqashan bolmaǵanyn aıtty.

Sondaı-aq, Toqaev aqparattyq keńistikte birlik pen kelisim ıdeıalaryn keńinen dáripteý mańyzdy ekenin alǵa tartty.