Prezıdent elordany kógaldandyrýda Toronto, Ottava, Helsınkı tájirıbesin qoldanýdy usyndy

ASTANA. QazAqparat – Elordany damytý máseleleri jónindegi keńeste Memleket basshysy Qasym-Jomart Toqaev qalany kógaldandyrý máselesine toqtaldy, dep habarlaıdy QazAqparat tilshisi.

«Qalany kógaldandyrý úlken mańyzǵa ıe, Astanada bul salada problemalar bar. Tipti, Máńgilik el dańǵylynda jasyl jelek jetispeıtindikten, basqa kósheler týraly ne aıtýǵa bolady. Maýsymdyq ósimdikterdi otyrǵyzý tájirıbesinen alshaqtap, kópjyldyq ósimdikterdi belsendi otyrǵyzý kerek. Bul rette elordanyń qatal klımatyn eskerý, ǵylymı qoǵamdastyqtyń áleýetin jáne úzdik álemdik tájirıbeni jumyldyrý mańyzdy»,- dedi Prezıdent.

Qasym-Jomart Toqaev kógaldandyrý qurylys qarqynyna sáıkes júrgizilýi kerektigin basa aıtty.

«Negizinde, Torontoda, Ottavada klımattyq aımaq Astanamen sáıkes keledi. Olar - jarasymdy kórinetin jasyl qalalar. Kanada tájirıbesin paıdalaný kerek. Munda qurylysshylardyń ózin belsendi túrde tartý kerek. Mysaly, Helsınkıde qurylysshylardy qurylystan keıin birden irgeles aýmaqtardy kógaldandyrýǵa mindetteıdi. Dál osy tájirıbeni biz de qoldanýymyz kerek. Germanııada tipti «bir mezgilde» prıntsıpine negizdelgen «Kógaldandyrý kodeksi» qabyldanǵan. ıAǵnı, qurylysshy qurylys alańyna teń jer ýchaskesin kógaldandyrýǵa mindetti. Mundaı tásil jaqsy jumys isteıdi», - dedi Memleket basshysy.