Prezıdent elordanyń ındýstrııalyq parkindegi jetekshi kásiporyndarmen tanysty
Qasym-Jomart Toqaev Astananyń mańyzdy nysandaryn aralaýdy, aldymen, №1 Indýstrııalyq parkten bastady. Munda Memleket basshysyna elordanyń ınvestıtsııalyq tartymdylyǵy jóninde málimet berildi, dep habarlaıdy Kazinform.
Astana qalasy ákiminiń orynbasary Evgenıı Glotovtyń baıandaýynsha, alǵashqy jartyjyldyqta elordanyń aımaqtyq jalpy óniminiń kólemi 4,7 trıllıon teńgeni quraǵan. Ósim kórsetkishi – 4,1 paıyz. AJÓ qurylymyndaǵy úlestiń basym bóligi, ıaǵnı 73 paıyzdan astamy shaǵyn jáne orta bızneske tıesili. Al ınvestıtsııanyń úlesi – 11,5 paıyz.
Investıtsııa tartý isinde №1 Indýstrııalyq park aıryqsha ról atqarady. Munda jalpy ınvestıtsııa somasy 322 mıllıard teńge bolatyn 100 joba júzege asyrylyp jatyr. Park óndiris aýqymy jaǵynan respýblıkada birinshi oryn alady. Іske qosylǵan sátten beri óndiris alańynda 6,7 trıllıon teńgeniń ónimi shyǵarylǵan.
Prezıdent elordanyń damýyna iri óndiris oryndary asa qajet ekenin aıtty.
– Astana halqynyń sany ósip keledi. Taıaý jyldary 1,5-2 mıllıon adamǵa jetýi múmkin. Sondyqtan turǵyndardy, jastardy jumyspen qamtamasyz etýimiz kerek, – dedi Qasym-Jomart Toqaev.
Memleket basshysyna arnaıy ekonomıkalyq aımaqta ornalasqan «Taý-Ken Altyn», «Stadler Kazakhstan», «DSS», «ENKO», «DUYQAZ», «VMP Astana» jáne «MFA International» sekildi jetekshi kásiporyndardyń jetistikteri tanystyryldy.
Quramynda qymbat metaldar bar shıkizatty óńdeýmen jáne affınajdaýmen aınalysatyn «Taý-Ken Altyn» zaýyty – «Samuryq-Qazyna» ulttyq ál-aýqat qorynyń basqarýyndaǵy tabysty kásiporyndardyń biri. Zaýyt iske qosylǵaly beri 10 jyl ishinde Ulttyq bank úshin 200 tonnadan astam taza altyn óndirip, 80,5 tonna qymbat metalǵa tollıng qyzmetin kórsetken.
Prezıdentke tanystyrylǵan taǵy bir óndiris orny – «Stadler Kazakhstan» JShS. Kásiporynnyń negizi bıyl shveıtsarııalyq Stadler Rail AG holdıngimen ınvestıtsııalyq kelisim nátıjesinde qalandy. Temirjol kóligin shyǵaratyn álemdegi kóshbasshy kompanııa Qazaqstanda jolaýshy vagondarynyń óndirisin jolǵa qoıýdy josparlap otyr. Eń aldymen, zaýyt ónimi otandyq jyljymaly quramdy jańartýǵa baǵyttalady. «Jolaýshylar tasymaly» AQ úshin ártúrli tıptegi 500-den asa vagon qurastyrylmaq.
Indýstrııalyq parktegi kásiporyn ókilderiniń aıtýynsha, olardyń shyǵaratyn ónimderi ishki naryqta da, odan tysqary jerlerde de suranysqa ıe.
«VMP Astana» zaýyty shyǵaratyn korrozııaǵa tózimdi ári órtten qorǵaıtyn lak-boıaý jabyndylary ónerkásiptiń túrli sektorynda keńinen qoldanylady. Ónimniń 90 paıyzdan astamy Reseıge eksporttalady, sondaı-aq Ózbekstan men Qyrǵyzstan naryqtaryna da shyǵarylady.
Elordanyń qurylys ındýstrııasyndaǵy joǵary suranys «ENKO» kompanııasynyń jylýmen jáne sýmen qamtamasyz etýge arnalǵan qurylǵylarǵa qyzmet kórsetetin óndiris-servıs keshenin ashýyna yqpal etti.
Túrkııalyq «MFA MASKE TİCARET SANAYİ A. Ş» kompanııasymen birlese shyǵarylatyn FFP1, FFP2 jáne FFP3 sanatyndaǵy respıratorlar da epıdemııalyq qaýip kúsheıgen kezeńde suranysqa ıe buıymǵa aınaldy. Qazirgi tańda №1 Indýstrııalyq parktiń rezıdenti – «MFA International» kompanııasy tehnologııalyq óndiristik jelilerdiń sanyn beske deıin arttyrdy. 2027 jylǵa deıin 10 óndiris jelisin iske qosýdy josparlap otyr. Bul kompanııaǵa jylyna 20 mıllıon respıratorǵa deıin óndirýge múmkindik beredi.
Qasym-Jomart Toqaev «DUYQAZ» JShS shyǵaratyn áskerı kıim, «Cuman Digital System Servis» JShS óndiretin telekommýnıkatsııa qurylǵylarynyń úlgilerimen, sondaı-aq basqa da kompanııalardyń ónimderimen tanysty.
