Prezıdent elordadaǵy medıtsına salasyn synǵa aldy
«Qalada medıtsınalyq qyzmettiń sapasyna jáne onyń qoljetimdi bolýyna qatysty shaǵym kóp. Bul jerde demografııany da eskergen jón. Elorda turǵyndarynyń sany sońǵy on jylda 2,5 ese ósti. Medıtsına ınfraqurylymy bul qarqynǵa ilese almaı jatyr. Emhanalarda kezek kóp. Perzenthanalarda oryn tapshy. Ondaǵy júkteme qalypty normadan 68 paıyzǵa artyq. Sondaı-aq keıbir aýrýhanada sanıtarlyq talaptar saqtalmaıdy. Balalar emhanasyndaǵy qabyldaý bólmeleri zaman talabyna saı emes. Qalada balalarǵa arnalǵan jalǵyz travmatologııa pýnkti bar. Jaraqat alǵan balalar sol jerde uzyn-sonar kezekte turýǵa májbúr bolady. Úshinshi kópsalaly balalar aýrýhanasy tek ınfektsııalyq aýrýlardan emdeıdi. Onda hırýrgııa, oftalmologııa jáne travmatologııa bólimderi jumys istemeıdi. Elorda úshin bul – uıat nárse», - dedi QR Prezıdenti jıynda.
Sondaı-aq Memleket basshysy Densaýlyq saqtaý mınıstrligine qala ákimdigimen birlesip, balalar medıtsınasyna qatysty máseleniń bárin sheshýdi tapsyrdy.
«Paıda tabýdy kózdegen jekelegen aýrýhanalar múmkindigi bola tura keıbir dárigerlik qyzmet kórsetýden bas tartyp jatyr. «Ulttyq ǵylymı medıtsına ortalyǵy jaqynda jekemenshikke ótti. Onda búıregin aýystyrǵan naýqastardy ońaltý jumysy toqtatylǵan. Álıhan Ashanuly, iri medıtsınalyq mekemelerdi jekeshelendirýdiń tıimdiligin qaıta qaraıtyn kez keldi. Budan bólek, medıtsına kadrlarynyń tapshylyǵy da qıyndyq týǵyzyp otyr. Qalada 600-den astam maman jetispeıdi. Densaýlyq saqtaý mınıstrligi osy máselelerdi sheshý qajet. Bul salaǵa bilikti mamandardy tartyp, olardyń turaqty jumys isteýin qamtamasyz etý kerek. Jeńis Mahmuduly, osy máseleni jeke baqylaýǵa alyńyz. «Elorda jastary» baǵdarlamasyna medıtsına qyzmetkerlerin qosý múmkindigin qarastyrý kerek», - dedi QR Prezıdenti.
