Prezıdent elordadaǵy aýrýhananyń apattyq jaǵdaıy problemasyn kóterdi
NUR-SULTAN. QazAqparat - Elordany odan ary damytý máseleleri jónindegi májiliste Memleket basshysy Qasym-Jomart Toqaev elordadaǵy Ortalyq temirjol aýrýhanasynyń apattyq jaǵdaıy problemasyn kóterdi, dep habarlaıdy QazAqparat tilshisi.
«Ortalyq temirjol aýrýhanasynyń apattyq jaǵdaıy erekshe nazar aýdarýdy qajet etedi. Ǵımaratqa kúrdeli jóndeý 60 jyl júrgizilmegen. Atap aıtqanda, bul aýrýhana búginde elordada halyq tyǵyz ornalasqan aýdannyń birine qyzmet kórsetýde. Saryarqa aýdanynda 400 myńǵa jýyq adam turyp jatyr», - dedi Prezıdent.
Osy oraıda Memleket basshysy qala basshylyǵyna jáne Densaýlyq saqtaý mınıstri Eljan Birtanovqa bul másele boıynsha túsinik berýdi surady.
Óz kezeginde Saryarqa aýdanynyń ákimi Erǵalı Egemberdi atalǵan aýrýhana boıynsha 12 gektar jer telimi bólingenin jáne joba memlekettik-jekeshelik áriptestik aıasynda qamtylǵanyn jetkizdi. Osy aýmaqta 159 saıajaı ýchaskesi ornalasqan. Bul turǵyda saıajaılardy súrip tastaý úshin qajetti qarjy bólinýde. Al 2020 jyldyń ekinshi jartyjyldyǵynda osy aýrýhana ǵımaratynyń qurylysy boıynsha jobalaý jumystary iske asyrylatyn bolady.
Mınıstr E. Birtanov bul baǵyttaǵy jumystar ákimdikke tıesili ekenin atap ótti.
«Kúrdeli jóndeýge qarjy jalpy sıpattaǵy transfertter aıasynda bólinedi jáne onyń barlyǵyn jergilikti atqarýshy organdar qajettilikke qaraı nysandar arasynda ózara bóledi. Aýrýhana ǵımaraty ábden eskirdi. Sondyqtan halyqaralyq standarttardy eskere otyryp, ony qaıtadan salý kerek», - dep túsindirdi E. Birtanov.
Osy oraıda jańa ýchaskede aýrýhana nysandaryn salý týraly sheshim qabyldandy. Qurylys jumystary aldaǵy jyly bastalyp, 2023 jyly aıaqtalady dep kútilýde.
Munymen qosa elorda ákimi Altaı Kólginov aýrýhana jabdyqtarynyń 40 paıyzy tozǵanyn jetkizdi.
«Aýrýhanaǵa kúrdeli jóndeý júrgizilmegen, sondyqtan qazirgi ýaqytta ǵımarattardy jóndeý tıimsiz bolyp tur. Sáıkesinshe, jańa ǵımarat salý qajettigi bar», - dedi qala ákimi.
Memleket basshysy aıtylǵandardy tyńdaı kele, Úkimet pen ákimge bul problemany sheshýdi tapsyrdy.
