Prezıdent elordadaǵy úshinshi JEO-nyń alǵashqy kezeginiń qyzmetimen tanysty
ASTANA. KAZINFORM - Astana ákimi Jeńis Qasymbek Prezıdentke qalanyń energetıkalyq ınfraqurylymynyń damý barysy týraly esep berdi, dep habarlaıdy Aqordanyń baspasóz qyzmeti.
Búginde úshinshi JEO-nyń alǵashqy kezegin, qosymsha qýaty saǵatyna 1100 Gkal bolatyn «Turan» jáne «Ońtústik-Shyǵys» gaz jylý stansalaryn paıdalanýǵa berý arqyly shahardyń jylytý qýaty 30 paıyzǵa ulǵaıǵan. Bıyl «Turan» stansasynyń ekinshi kezegin tolyǵymen aıaqtaý, sondaı-aq «Telman» stansasy men ekinshi JEO-ny keńeıtý jáne «Ońtústik-Batys» gaz jylý stansasyn jobalaý kózdelip otyr. Bul jobalardyń barlyǵyn júzege asyrý 2035 jylǵa deıin josparlanǵan qosymsha jylý energııasyn alýǵa múmkindik beredi.
Qasym-Jomart Toqaevqa úshinshi JEO-nyń ekinshi kezegi aıasynda bý-gaz qondyrǵysyn ornatý jospary kórsetildi.
Memleket basshysyna úshinshi JEO-nyń tabıǵı gazben jumys istep, eń joǵary qýaty saǵatyna 440 Gkal óndirýge jetetini jóninde baıandaldy. Bul jylý energııasy shahardyń ońtústik-batys bóliginiń suranysyn óteıdi. Qazirgi ýaqytta úshinshi JEO-nyń alǵashqy kezegin qosymsha otyn qorymen qamtamasyz etý jumystary júrgizilip jatyr.
Prezıdent Astananyń energetıkalyq ınfraqurylymyn odan ári damytýdyń mańyzyna nazar aýdardy.
Osyǵan deıin prezıdent sý dıplomatııasyn kúsheıtýdi qolǵa alýymyz kerek ekenin aıtty.