Prezıdent: Elimizdiń Egemendigi, Táýelsizdigi – eń mańyzdy, eń qasterli qundylyq
ASTANA. KAZINFORM – Halqymyzdyń aýyzbirshiligin nyǵaıtý basty maqsatymyz bolyp qala beredi. Bul – eldiń tabysty damýynyń birden-bir sharty, tıimdi ári uzaqmerzimdi faktory. Bul pikirdi Memleket basshysy Qasym-Jomart Toqaev Astanada Memlekettik Tý kóterý rásiminde aıtty.
– Reformalardyń bastapqy kezeńinde elimizdegi kózi ashyq jáne progressıvti qoǵamdyq-saıası kúshter jalpyulttyq qundylyqtar men maqsattar aıasynda birigýi qajet dep sanaımyn. Sonda ǵana Ádiletti Qazaqstandy qurý, memlekettiligimizdi nyǵaıtý isinde tabysqa jete alamyz, – dedi Prezıdent.
Memleket basshysy elimizdiń Egemendigi, Táýelsizdigi – eń mańyzdy, eń qasterli qundylyq ekenin atap ótti.
– Biz órkenıetti ári ozyq oıly ult retinde ózimizge senimdi bolýymyz kerek. Eshkimge jaltaqtamaı batyl áreket etýimiz qajet. Budan basqa jol joq. Maqsaty aıqyn, kózi ashyq, kókiregi oıaý azamattarymyz memleket taǵdyryna jaýapty ekenin tereń túsinedi. Olar eriktiler qataryna qosylyp, qaıyrymdylyq jasap, mańyzdy bastamalardy tabysty iske asyryp júr. Naǵyz otanshyl adam kózboıaýshylyqqa barmaıdy, shyn patrıot el múddesi úshin tabandy eńbek etedi. Jasampaz otanshyldyq degenimiz de – osy, – dedi Qasym-Jomart Toqaev.
Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Prezıdent bul kún – qazaq eliniń árbir azamaty úshin mańyzy erekshe mereke ekenin aıtty.
Sondaı-aq, Qasym-Jomart Toqaev Táýelsizdigimizdiń 35 jyldyǵyn naqty nátıjelermen qarsy alý kerektigin tapsyrdy.
