Prezıdent elimizdiń áleýmettik-ekonomıkalyq jetistikterine toqtaldy

TÚRKІSTAN. KAZINFORM – Memleket basshysy Qasym-Jomart Toqaev elimizdiń áleýmettik-ekonomıkalyq jetistikterine erekshe toqtalyp ótti. 

– Osy kúrdeli ahýalǵa qaramastan, biz barlyq syn-qaterdi eńserip, alǵa qaraı nyq senimmen qadam basyp kele jatyrmyz.

Byltyr ekonomıkamyz 6,5 paıyzǵa ósti. Jalpy ishki ónim 306 mıllıard dollarǵa jetti. Al onyń jan basyna shaqqandaǵy úlesi alǵash ret 15 myń dollar boldy. Bul – TMD elderiniń arasyndaǵy rekordtyq kórsetkish.

Altyn-valıýta qorymyz 74 mıllıard dollarǵa jýyqtady. Biz osyndaı joǵary deńgeıge Táýelsizdik tarıhynda alǵash ret jetip otyrmyz.

Ortalyq Azııa aımaǵyna tartylǵan taza shetel ınvestıtsııasynyń 69 paıyzy Qazaqstanǵa tıesili. Shaǵyn jáne orta bıznestiń ulttyq ekonomıkadaǵy úlesi búginde – 40 paıyz.

Azamattardyń ortasha ómir súrý uzaqtyǵy 75,9 jasqa jetti. Biz bıyl álemdegi ekonomıkasy asa iri 50 eldiń qataryna qosyldyq. Halyqaralyq valıýta qorynyń boljamy boıynsha jahandyq ekonomıkanyń damýyna úles qosyp otyrǵan dúnıe júzindegi 25 memlekettiń biri atandyq.

Elimizdiń yntymaq-birligi men halqymyzdyń tabandy eńbeginiń arqasynda orasan zor tabysqa qol jetkizdik. Biraq munymen toqtap qalýǵa bolmaıdy, - dedi Prezıdent. 

Osyǵan deıin Memleket basshysy quryltaı, Halyq keńesi ınstıtýttary arqyly halyq bıliginiń ozyq úlgisi qalyptasatynyn aıtty.