Prezıdent: Elimizdegi memleket pen jeke seriktestik áleýeti durys ıgerilmeı otyr
ASTANA. KAZINFORM — Elimizdegi memleket pen jeke seriktestik áleýeti durys ıgerilmeı otyr. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
- Memleket pen jeke seriktestik – ekonomıkaǵa ınvestıtsııanyń kelýin yntalandyratyn mańyzdy quraldyń biri. Bul tetikti ońtaıly paıdalana alsaq, ınvestıtsııalyq táýekeldi memleket pen bıznes arasynda tıimdi bólýge múmkindik týady. Biraq elimizdegi memleket pen jeke seriktestik áleýeti durys ıgerilmeı otyr, – dedi Prezıdent.
Memleket basshysynyń aıtýynsha, ınfraqurylymdyq jobalardyń kóbi burynǵydaı tikeleı bıýdjet qarjysyna táýeldi. Jeke kapıtal, bank sektory jáne halyqaralyq qarjy uıymdary oǵan aıtarlyqtaı atsalyspaıdy. Bıýdjettiń múmkindigi shekteýli. Sondyqtan mundaı tásil kóptegen ınvestıtsııalyq jobalardy júzege asyrýǵa bóget bolyp otyr.
- Álbette, kez kelgen qarjy quraly sııaqty memleket pen jeke seriktestiktiń de óz quny bar. Alaıda, ol ózin-ózi aqtasa, Úkimet atalǵan mehanızmdi belsendi qoldanǵany jón. Qajet bolsa, zańnamaǵa da tıisti ózgeris engizýge bolady, - dedi Qasym-Jomart Toqaev.
Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.
