Prezıdent: Elimizde salyq ofshoryna uqsaıtyn ahýal qalyptasty
BÝRABAI. KAZINFORM – Prezıdent Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda eldiń salyq júıesinde ofshorǵa uqsaıtyn ahýal qalyptasqanyn synady.
- Qazaqstanda túrli salyq rejımi, kóptegen jeńildikter men preferentsııalar bar. Onyń bári elimizde salyq ofshory sııaqty ahýal qalyptastyrdy. Kásipkerlerdiń eki negizgi toby paıda boldy. Olar – zańnamadaǵy olqylyqtardy paıdalanyp, salyq salynatyn tabysyn ózi úshin azaıtyp kórsetetinder jáne barlyq salyqty adal tóleıtinder. Kásipkerlerdiń osy ekinshi toby básekege tótep bere almaı jatyr, - dedi Qasym-Jomart Toqaev
Memleket basshysy Úkimet salyq tóleýden jaltarý úshin bıznesin bólshekteıtinderdiń áreketine oryndy nazar aýdarǵanyn atady.
- Ókinishke qaraı, mundaı jaǵdaı jappaı beleń alǵan. Zańnamadaǵy olqylyqtar bıznesti bólshekteýge jol berip otyrǵanyn moıyndaý kerek. Bul máselege Úkimet te, depýtattar da jete mán bermegen.
Taǵy da ádemi kórsetkishterge áýestenip kettik: elimizde eki mıllıonnan astam salyq tóleýshi, ıaǵnı jeke kásipkerler men zańdy tulǵalar tirkelgen desedi. Biraq olardyń qandaı kásiporyndar ekenine, qalaı paıda bolǵanyna, qansha salyq tóleıtinine, tipti ony tólep jatyr ma, joq pa degenge esh taldaý jasalmaǵan. Biraq qur kinálaýdan is ońǵa baspaıdy.
Endi ahýaldy shuǵyl túzetý qajet. Úkimet pen Parlamentke aıtarym – zańnamaǵa jedel túrde tıisti túzetýlerdi engizý kerek, - dedi Prezıdent.
Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.
Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi.
Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymyn ázirlenetinin aıtty.
2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.