JI olımpıadasynda álemdi ózgertetin jańa ıdeıalar men jobalar dúnıege kelýi múmkin — Prezıdent
ASTANA. KAZINFORM — Memleket basshysy Jasandy ıntellekt boıynsha halyqaralyq olımpıadanyń ashylý saltanatynda elimiz sapaly bilimge, daryndy balalardy jan-jaqty qoldaýǵa basa nazar aýdaratynyn aıtty. Bul týraly Aqorda málim etti.
— Byltyr Beıjińde ótken Jasandy ıntellekt boıynsha olımpıadadan Qazaqstan oqýshylary úsh altyn, bir kúmis jáne úsh qola medal jeńip aldy. El mereıin asyratyn bul jetistik jastarymyzdyń zııatkerlik jáne shyǵarmashylyq áleýetiniń zor ekenin kórsetedi. Oraıly sátti paıdalana otyryp, talantty órenderimizge baǵyt-baǵdar berip júrgen ustazdar men tálimgerlerge alǵys aıtamyn, — dedi Memleket basshysy.
Prezıdent bul olımpıada jasandy ıntellektini zertteýshi jastardyń halyqaralyq qaýymdastyǵynyń damýyna úlken serpin beretinine senim bildirdi.
— Bilim qaı zamanda da halyqty biriktirip, adamzatty órkenıettiń shyńyna jeteledi. Sizderdiń qarym-qabiletterińiz medıtsına, bilim, ekologııa jáne basqa da óte mańyzdy salalardaǵy tyń sheshimderge negiz bola alady. Dál osy olımpıadada álemdi ózgertetin jańa ıdeıalar men jobalar dúnıege kelýi múmkin, — dedi Memleket basshysy.
Qasym-Jomart Toqaev olımpıada qatysýshylaryna sáttilik tilep, osy mańyzdy sharany uıymdastyrýǵa úles qosqan barsha azamatqa shynaıy rızashylyǵyn bildirdi.
Eske sala keteıik, Memleket basshysy Qasym-Jomart Toqaev Astanada ótken Jasandy ıntellekt boıynsha ІІІ halyqaralyq olımpıadanyń ashylý saltanatynda sóz sóıledi.
