Prezıdent elektrosamokattar týrasynda: árbir balanyń ómiri qymbat

ASTANA. KAZINFORM — Elimizde kólik apattary azaımaı tur. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty. 

— Halyqtyń ómiri men densaýlyǵyna tikeleı áser etetin taǵy bir túıtkil, bul — jol qaýipsizdigi. Men byltyrǵy Joldaýda buǵan arnaıy toqtaldym. Árıne biraz sharýa jasalyp jatyr. Soǵan qaramastan kólik apattary azaımaı tur. Jyl basynan beri 22 myńnan astam jol-kólik oqıǵasy tirkelgen. Shyn máninde, kóp nárse kólik júrgizýshileriniń ózine baılanysty, sebebi jol erejesin buzatyndar az emes. Árbir adam óz ómirine jáne aınalasyndaǵy adamdardyń qaýipsizdigine jaýapty ekenin sezinýge tıis. Kólik júrgizý mádenıetin búkil qoǵam bolyp qalyptastyrý qajet, — dedi Qasym-Jomart Toqaev.

Prezıdenttiń paıymynsha, elektrosamokattar máselesine nazar aýdarǵan jón.

— Bul taqyryp qoǵamda qyzý talqylanyp jatyr. Eki jyl buryn jaıaý júrginshiler jolymen júrýge shekteý qoıatyn zańnamalyq ózgerister engizildi. Biraq qoǵamdyq oryndardaǵy ahýal ózgere qoıǵan joq, áli de azamattarǵa qaýip-qater tónip tur. Qazir bul salany retteıtin zańǵa túzetýler ázirlendi. Ony kóp sozbaı qabyldaý kerek. Árbir azamattyń, árbir balanyń ómiri qymbat. Bul máselede usaq-túıek degen bolmaıdy. Túptep kelgende, munyń árqaısysy — Qaýipsiz Qazaqstandy qurý jolyndaǵy mańyzdy qadamdar, — dedi Memleket basshysy. 

Aıta ketelik samokat tizgindegenderdiń áreketi úshin kıksherıng kompanııalar jazalanýy múmkin.