Prezıdent: Elektrondyq Parlamentti damytýǵa basymdyq beriledi
ASTANA. KAZINFORM — Memleket basshysy Qasym-Jomart Toqaev jańa Quryltaıdyń tehnologııalyq progrestiń jetekshi faktory bolaryna úmit bildirdi. Depýtattar zań shyǵarý qyzmetinde tsıfrlyq tehnologııalar men Úlken derekterdi keńinen qoldanýy tıis ekenin málimdedi.
Byltyr qazan aıynda ótken Parlamenttik reforma jónindegi jumys tobynyń alǵashqy otyrysynda Prezıdent tolyqqandy e-Parliament júıesin engizý máselesin kóterdi.
— Qazaqstan e-Government, ıaǵnı Elektrondyq úkimettiń damý deńgeıi boıynsha jahandyq reıtıngte álemdegi úzdik 25 eldiń qataryna kirdi. Endi Elektrondyq Parlamentti qalyptastyrýǵa jáne damytýǵa kóp kúsh-jiger jumsaýymyz qajet, — dedi Qasym-Jomart Toqaev Parlament palatalarynyń sońǵy birlesken otyrysynda.
Jańadan saılanǵan depýtattar zań shyǵarý isinde boljamdy saraptamaǵa, Úlken derekqordy basqarý arqyly kez kelgen sheshimniń ekonomıkalyq saldary men áleýmettik táýekelderin modeldeýge basa mán berýi kerek.
— Mańyzdy zań jobalaryn sarapshylarmen jáne jaýapty qoǵam belsendilerimen birge talqylaǵan jón. Tsıfrlyq quraldardy paıdalaný qajet. Bul pikirtalasqa qatysýshylar sanyn kóbeıtip, máseleni naǵyz qoǵamdyq talqyǵa salýǵa múmkindik beredi, — dedi Memleket basshysy.
Sondaı-aq Quryltaı jalpyulttyq deńgeıdegi ashyq dıalog alańy retinde qyzmet etip, qoǵamdy tolǵandyrǵan ózekti máselelerge der kezinde nazar aýdarýy qajet.
— Bul — azamattardyń dáıekti ótinishteri mindetti túrde eskerilip, naqty normatıvtik-quqyqtyq aktilerdi qabyldaý arqyly memlekettik mekemelerge tıisti tapsyrmalar berilýi kerek degen sóz, — dep túıindedi Prezıdent.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis.
