Prezıdent: Eldegi turaqtylyqty kúshtik qurylymdar emes, halyqtyń ózi qamtamasyz etýi qajet
NUR-SULTAN. QazAqparat – Halyq eń aldymen el irgesiniń beriktigin tereń jaýapkershilikpen sezinýi kerek. Eldegi mıtıngterge qatysty bul pikirdi Memleket basshysy Qasym-Jomart Toqaev respýblıkalyq «Ana tili» basylymyna bergen suhbatynda bildirdi, dep habarlaıdy QazAqparat tilshisi.
«Beıbit jıyndar men mıtıngterge qatysý – Qazaqstan azamattarynyń konstıtýtsııalyq quqyǵy. Ata zańymyzdyń kepili retinde azamattardyń quqyǵyn tolyq qamtamasyz etý – meniń mindetim. Bul jóninde byltyrǵy Joldaýymda aıttym», - dedi Prezıdent.
Memleket basshysy Parlament «Beıbit jıyndar týraly» jańa zań qabyldaǵanyn eske saldy.
«Qoǵamdyq saraptamadan ótken atalǵan zań – meniń oıymsha, elimizdegi demokratııany ilgeriletý úshin jasalǵan mańyzdy qadam. Endi beıbit jıyndardy ótkizý úshin ruqsat suramaı-aq, bes kún buryn jergilikti bılikke eskertse jetkilikti. Osyndaı jıyndardy ótkizý úshin birqatar arnaıy oryndar bólindi. Mıtıng uıymdastyrýshylardan qoǵamdyq tártip pen azamattardyń tynyshtyǵyn buzbaý talap etiledi. Sondaı-aq olar Konstıtýtsııaǵa qaıshy keletin úndeýlermen shyqpaýy, ultaralyq jáne áleýmettik alaýyzdyq týǵyzbaýy qajet. Bul – qalypty jaǵdaı. Ásirese AQSh-ta jáne basqa da damyǵan elderde bolǵan sońǵy oqıǵalardy eskerý kerek», - deıdi Memleket basshysy.
Qasym-Jomart Toqaev halyqaralyq quqyq qorǵaý uıymdarynan grant alatyn keıbir azamattarymyz qabyldanǵan zańdy negizsiz synaıtynynan da habary baryn jetkizdi.
«Olardyń pikirinshe, Qazaqstanda «Mıtıngke qashan shyǵamyn? Kimmen shyǵamyn jáne qaı jerde ótkizemin? ıAǵnı ózim bilem» degen júgensizdik qaǵıdaty bolýy kerek eken. Ásirese solardyń mıtıngige shetel azamattary men kámeletke tolmaǵan balalardyń qatysýyn talap etýin shekten shyqqandyq dep sanaımyn. Olardyń oıy belgili. Ondaı adamdarǵa tynyshtyq pen turaqtylyq qajet emes. Al biz qarqyndy damyǵan, tatýlyǵy jarasqan Táýelsiz Qazaqstandy saqtaýymyz kerek. Halyq eń aldymen el irgesiniń beriktigin tereń jaýapkershilikpen sezinýi kerek. Sonymen qatar memleket óz azamattarynyń zańdy talaptaryna qulaq asýǵa, qarjylyq jáne quqyqtyq múmkindikter aıasynda olarǵa járdem berýge mindetti», - dep atap ótti ol.
Prezıdent jastar úshin áleýmettik lıft ornyqtyrý kerektigin, ol úshin memlekettik basqarý isindegi jáne ıdeologııa salasyndaǵy qatelikterdi der kezinde túzetý qajettigin málim etti.
«Eger jumys osylaı júretin bolsa, sózsiz ádildik ornaıdy. Men muny saılaý aldyndaǵy baǵdarlamamda aıtqan bolatynmyn. Sonda mıtıngtiń de qajeti bolmaı qalady. Sońǵy kezderi elimizde «mıtıngshildik» beleń alýda. Kóbinese azamattarymyz syrttaǵy bireýlerdiń arandatýshylyq urandaryna erip júr. Bul – aımaqtyq básekelestik kúsheıip kele jatqan halyqaralyq arenada Qazaqstandy yńǵaısyz jaǵdaıǵa qaldyryp otyr. Qazaqstan men Ózbekstan – Ortalyq Azııadaǵy eń iri memleketter. Eki el arasynda keń aýqymdy yntymaqtastyq artyp keledi. Bul jerde ekonomıkalyq básekelestiktiń de bolatynyn joqqa shyǵarmaımyz. Osy jaǵdaılardy árqashan este ustaý kerek. Qazaqstan óziniń kóshbasshylyq pozıtsııasyn saqtap qalýǵa mindetti. Ol úshin elimizde turaqtylyq bolýǵa tıis. Eger ishki mádenıetimizge salsaq, ol turaqtylyqty kúshtik qurylymdar emes, birinshi kezekte halyqtyń ózi qamtamasyz etýi qajet», - dedi Prezıdent.
