Prezıdent Qazaqstan shahmat federatsııasynyń aldynda turǵan basym mindetterdi atady
ASTANA. KAZINFORM – Memleket basshysy Halyqaralyq shahmat federatsııasynyń (FIDE) prezıdenti Tımýr Týrlovty qabyldady. Bul týraly Aqordanyń baspasóz qyzmeti habarlady.
Qasym-Jomart Toqaev Tımýr Týrlovty Halyqaralyq shahmat federatsııasynyń prezıdenti bolyp saılanýymen quttyqtady. Prezıdenttiń aıtýynsha, bul Qazaqstan men otandyq shahmat mektebiniń álemdik arenadaǵy abyroıy artyp kele jatqanyn kórsetedi.
Memleket basshysy elimiz úshin shahmattyń orny erekshe ekenine toqtaldy. Shahmat sporttyń bir túri bolýymen qatar óskeleń urpaqtyń zııatkerlik áleýetin damytýdyń mańyzdy tetigi sanalady.
Sońǵy jyldary qazaqstandyq shahmat mektebi qarqyndy damyp kele jatyr. Elimizde sporttyń osy túrimen 278 myńnan astam adam júıeli túrde aınalysady.
Qasym-Jomart Toqaev Samarqandta ótken Dúnıejúzilik shahmat olımpıadasynda kúmis medal ıelengen áıelder quramasynyń jarqyn jetistigin aıryqsha atap ótti.
Budan bólek, Prezıdent Qazaqstan shahmat federatsııasynyń aldynda turǵan basym mindetterdi atady.
Memleket basshysy qurama komandanyń ázirligin kúsheıtý, jas talanttardy anyqtaý men daıarlaýdyń tıimdi júıesin qurý, bilim berý salasynda shahmatty ilgeriletý jáne óńirlerde shahmat ınfraqurylymyn damytý qajettigine nazar aýdardy.
Qasym-Jomart Toqaev otandyq bapkerler men tóreshilerdiń biliktiligin arttyrý, birlesken bilim berý jobalaryn iske asyrý, sondaı-aq Qazaqstanda shahmattan iri halyqaralyq jarystar ótkizý úshin ulttyq federatsııa men FIDE arasyndaǵy yntymaqtastyqty nyǵaıtýdyń mańyzyna basa mán berdi.
Kezdesý sońynda Qasym-Jomart Toqaev Tımýr Týrlovtyń jaýapty qyzmetine tabys tiledi.
FIDE basshysy shahmatty damytýǵa den qoıyp, oǵan qoldaý kórsetkeni úshin Qazaqstan Prezıdentine rızashylyǵyn bildirdi. Sonymen qatar shahmatty álemde keńinen nasıhattaý, halyqaralyq yntymaqtastyqty nyǵaıtý jáne ulttyq shahmat federatsııalarynyń qatysýymen jańa jobalardy iske asyrý jóninde málimet berdi.
Aıta ketelik Tımýr Týrlov FIDE-niń jańa prezıdenti bolǵan edi.
