Prezıdent el damýynyń uzaqmerzimdi basymdyqtaryna arnalǵan qujat ázirleýdi tapsyrdy
ASTANA. KAZINFORM — Ulttyq josparlar men strategııalardy synı turǵyda qaıta zerdeleýimiz kerek. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
— Buǵan deıin aıtqanymdaı, elimiz jańa tarıhı kezeńge qadam basyp keledi. Osyndaı betburys kezeńinde ulttyq josparlar men strategııalardy synı turǵyda qaıta zerdeleýimiz kerek. Táýelsizdigimizdiń kelesi mańyzdy belesine qandaı «júkpen» jetetinimizdi naqty túsinýge tıispiz, — dedi Qasym-Jomart Toqaev.
Memleket basshysynyń paıymynsha, uzaq merzimdi perspektıvany paıymdaý qazirgi mindetterimiz ben basymdyqtarymyzdy aıqyndaýǵa, egemendiktiń strategııalyq baǵytyn nyq ustanýǵa jáne jasampaz josparlardy júzege asyrýǵa múmkindik beredi.
— Sondyqtan Prezıdent Ákimshiligi Strategııalyq josparlaý jáne reformalar agenttigimen birlesip, eń aldymen, Qazaqstannyń strategııalyq zertteýler ınstıtýtyn qosa alǵanda ǵylymı ortalyqtardy tarta otyryp, bir jyl ishinde elimizdiń damý basymdyqtaryna qatysty uzaq merzimdi paıymdy qamtıtyn qujat ázirleýge tıis. Bul mańyzdy qujatty ázirleýge depýtattar da óz úlesin qosa alady dep oılaımyn, — dedi Prezıdent.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
