Prezıdent el taǵdyry qyl ústinde turǵan syn saǵatta qıyn sheshimder qabyldady – Erlan Qoshanov
«Búgingi Ulttyq quryltaıǵa biz ata-babalarymyzdyń artynda qaldyrǵan – tatýlyq pen birliktiń baıraǵyn kóterip, adal amanatyn arqalap kelip otyrmyz. Barsha kópultty otandastarymyzdyń osy ıgi jolda Memleket basshysy Qasym-Jomart Kemeluly Toqaevtyń «Babalar amanatyna adal bolyp, ony urpaqqa tabystaý – men úshin kıeli paryz» degen ardaqty sózinen qýat alǵany aqıqat! Oǵan osydan eki apta buryn Ata zańymyzǵa engizilgen ózgeristerge arnalyp ótken respýblıkalyq referendýmnyń oń nátıjeleri aıqyn dálel. Qazaq eli óz tarıhynyń jańa belesine aıaq basty», - dedi E. Qoshanov.
Onyń paıymynsha, tarıhı referendým birneshe shyndyqtyń basyn ashyp berdi.
«Birinshi shyndyq – birlik. Qazaq halqynyń, Qazaqstan jurtynyń memlekettik, ulttyq baǵytta uıysa biletinin, syn saǵatta saıası ambıtsııasyn ysyryp, asqan muratshyldyq pen aýyzbirshilik úlgisin tanytyp, ony elge de, álemge de pash etti. Halqymyz Memleket basshysy Qasym-Jomart Kemeluly Toqaevtyń Ekinshi respýblıka qurýdy kózdegen strategııalyq baǵytyn, tereń reformalaryn, eldi túbegeıli ózgertýge baǵyttalǵan tarıhı talpynysyn basym daýyspen qoldady. Elimiz reformalardyń odan ári jalǵasýyn, jalǵasa berýin qalap otyr. El-jurtty aralap, myńdaǵan kezdesýler ótkizgen kezde Májilis depýtattary, «Amanattyń» óńirdegi ókilderi osyǵan tolyq kóz jetkizdik. Túptep kelgende, Qasyretti qańtar oqıǵasynan keıin Qazaqstannyń bolashaǵyna, qazaq qoǵamynyń birligine kúmán keltirgender de az bolǵan joq. Alaıda tarıhı referendým halqymyzdyń tutastyq pen aýyzbirshilikke, memleketshildik muraty men táý etken Táýelsizdikke adal ekenin aıqyn kórsetti», - dedi Májilis tóraǵasy.
«Osy tusta, Qasym-Jomart Kemeluly, men bir nárseni erekshe atap ótkim keledi. El taǵdyry qyl ústinde turǵan sol syn saǵattarynda asa aýyr jaǵdaıda qandaı qıyn sheshimder qabyldaǵanyńyzdyń kýágeri boldyq. Ol týraly keshegi bergen tele-suhbatyńyzda ózińiz de aıttyńyz. Sol sheshimder bizdiń táýelsizdigimiz ben memlekettigimizdi saqtap qalǵany – aqıqat», - dedi Erlan Qoshanov.
Budan buryn habarlanǵandaı, búgin QR Prezıdenti Qasym-Jomart Toqaevtyń qatysýymen Ulttyq quryltaıdyń alǵashqy otyrysy ótip jatyr.
Aıta keteıik, búgin Prezıdent jańadan qurylǵan Ulytaý oblysyna jumys saparymen kelgen bolatyn.
Keshe Memleket basshysynyń Ulttyq quryltaı qurý týraly Jarlyǵy jarııalandy.