Prezıdent ekonomıkaǵa ınvestıtsııa tartý tıimdiligin arttyratyn qujatty maquldady

Memleket basshysy «El ekonomıkasyna ınvestıtsııalar tartý jónindegi jumystyń tıimdiligin arttyrý jónindegi sharalar týraly» Jarlyqqa qol qoıdy, dep habarlaıdy Kazinform.

«Qazaqstan Respýblıkasy Konstıtýtsııasynyń 44-babynyń 21) tarmaqshasyna sáıkes otandyq jáne sheteldik ınvestorlar iske asyratyn ınvestıtsııalyq jobalardy tıimdi jáne pármendi túrde qoldaý jónindegi qyzmetti úılestirý men baqylaý deńgeıin arttyrý esebinen olardy iske asyrý arqyly ekonomıkalyq ósýdiń joǵary qarqynyn jáne ulttyq ekonomıkany naqty ártaraptandyrýdy qamtamasyz etý maqsatynda QAÝLY ETEMІN:

1. Investıtsııalardy tartý jónindegi keńestiń (Investıtsııalyq shtabtyń) mynadaı:

1) ortalyq jáne jergilikti memlekettik organdardyń, sondaı-aq kvazımemlekettik sektor sýbektileriniń oryndaýy úshin mindetti sheshimder qabyldaý;

2) Qazaqstan Respýblıkasy Konstıtýtsııasynyń 61-babyna sáıkes Qazaqstan Respýblıkasynyń Úkimeti qabyldaıtyn zań kúshi bar ýaqytsha normatıvtik quqyqtyq aktilerdi ázirleý;

3) Qazaqstan Respýblıkasynyń Prezıdentine jáne Qazaqstan Respýblıkasynyń Premer-Mınıstrine Investıtsııalyq shtabtyń sheshimderin oryndamaǵany nemese tıisinshe oryndamaǵany úshin ortalyq jáne jergilikti memlekettik organdardyń, sondaı-aq kvazımemlekettik sektor sýbektileriniń basshylaryn tártiptik jaýaptylyqqa tartý, onyń ishinde atqaratyn laýazymynan bosatý jóninde usynystar engizý ókilettikteri aıqyndalsyn.

2. Mynalardyń:

1) Investıtsııalyq shtab tóraǵasy men músheleriniń Qazaqstan Respýblıkasynyń Prezıdentine toqsanyna keminde bir ret júrgizilgen jumys týraly esep usyna otyryp, ınvestıtsııalyq ahýaldy jaqsartý, sondaı-aq ınvestıtsııalyq jobalardy ýaqtyly iske asyrý úshin;

2) ortalyq jáne jergilikti memlekettik organdar, sondaı-aq kvazımemlekettik sektor sýbektileri basshylarynyń Investıtsııalyq shtab sheshimderin oryndamaý nemese tıisinshe oryndamaý úshin derbes jaýapkershiligi belgilensin.

3. Qazaqstan Respýblıkasynyń Úkimeti osy Jarlyqtan týyndaıtyn sharalardy shuǵyl tártippen qabyldasyn.

4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

5. Osy Jarlyq qol qoıylǵan kúninen bastap qoldanysqa engiziledi», — delingen qujatta.