Prezıdent el damýynyń basty sharttaryn atady
ASTANA. KAZINFORM — Memleket basshysy Qasym-Jomart Toqaev Respýblıka kúnine arnalǵan saltanatty jıynda sóz sóılep, básekege qabiletti ári otanshyl urpaq tárbıeleýdiń mańyzyn aıtty, dep habarlaıdy Aqordanyń baspasóz qyzmeti.
Prezıdent elimizde zań men tártip bolmasa, damý da bolmaıtynyn aıtty.
— Ózderińiz bilesizder, qazir álem asa joǵary qarqynmen ózgerýde. Órkenıet kóshinen qalyp qoımaý úshin zaman talabyna saı áreket etý udaıy mańyzdy. Adam kapıtalyn damytý – elimizdiń konstıtýtsııalyq mindeti. Biz sanaly, jaýapkershiligi mol, oıy ushqyr, básekege qabiletti, otanshyl jáne adal azamattardy tárbıeleýimiz kerek. Bul – elimizdiń ósip-órkendeýiniń kepili. Otanshyldyq, eńbekqorlyq, jasampazdyq, ózara syılastyq, janashyrlyq qundylyqtaryn keń aýqymda dáriptep, qoǵamymyzda jańarǵan etıka qalyptastyrýymyz qajet. Halyqaralyq ahýaldy, sonyń ishinde damyǵan elderde bolyp jatqan sońǵy oqıǵalardy kórip-bilip otyrsyzdar. Rasynda Zań men Tártip saqtalmasa, tatýlyq pen yntymaq bolmasa, eshqandaı damý, qysqasy, tórt qubylamyz túgel bolmaıtyny aıdan anyq. Biz aýyzbirshiligimizdi saqtap, ortaq múdde jolynda birtutas qoǵam bolyp eńbek etsek, kez kelgen belesti baǵyndyramyz, barlyq maqsat-muratymyzǵa jetemiz. Men buǵan kámil senemin! — dedi Memleket basshysy.
