Ekonomıkanyń barlyq salasy odan ári tsıfrlandyryla beredi
Qazaqstan iri ónerkásiptik óndiristen bastap, shaǵyn servıstik jobalarǵa deıingi ekonomıkanyń barlyq salasyn odan ári tsıfrlandyrýǵa basa mán beredi. Bul týraly búgin elordada «Altyn sapa» jáne «Paryz» syılyqtarynyń jeńimpazdaryn marapattaý kezinde Memleket basshysy Qasym-Jomart Toqaev málim etti, dep habarlaıdy Kazinform.
«Qazaqstan elektrondy úkimet pen qarjylyq-tehnologııalyq damý ındeksi boıynsha álemde jetekshi oryn alady. Jaqynda ǵana ulttyq valıýtanyń ınnovatsııalyq formaty — tsıfrlyq teńgeni iske qostyq. Bul mańyzdy qadam otandyq qarjy júıesiniń damýyna tyń serpin beretinine senimdimin», — dedi Qasym-Jomart Toqaev.
Bul turǵyda Prezıdent elimizde IT sektor qarqyndy damyp jatqanyn aıtty.
«Ozyq memleketter ekonomıkasyndaǵy bul salanyń úlesi jyl saıyn ulǵaıyp keledi. Byltyr otandyq IT ındýstrııa eksporty bes ese ósti. Men onyń kólemin 2026 jylǵa qaraı bir mıllıard dollarǵa jetkizý mindetin júktedim. Biz iri ónerkásiptik óndiristen bastap, shaǵyn servıstik jobalarǵa deıingi ekonomıkanyń barlyq salasyn odan ári tsıfrlandyrýǵa basa mán beremiz. Biraq bosańsýǵa, jetistikterge toqmeıilsýge bolmaıdy», — dedi Memleket basshysy.
