Prezıdent Ekonomıkalyq yntymaqtastyq jáne damý uıymynyń Bas hatshysy Matıas Kormanmen kezdesti
HAINANЬ. KAZINFORM – Boao Azııa forýmynyń aıasynda Memleket basshysy Ekonomıkalyq yntymaqtastyq jáne damý uıymynyń (EYDU) Bas hatshysy Matıas Kormanmen kezdesý ótkizdi.
Qazaqstan Prezıdenti Bas hatshyǵa iltıpat bildire otyryp, onyń Boao forýmyna qatysýy EYDU-nyń Azııaǵa aıryqsha nazar aýdaratynyn dáleldeıdi dep atap ótti.
– Bul aımaqty alyp ekonomıkalyq qaýymdastyq deýge bolady. Sondaı-aq Qazaqstan osy keńistikte, kem degende, óńirlik ólshemde asa mańyzdy ról atqarady. Forýmda sóılegen sózimde EYDU-men aradaǵy yntymaqtastyqqa erekshe mán beretinimiz jóninde aıttym. Ókilderimiz EYDU komıtetteriniń otyrystaryna turaqty túrde qatysady. Biz uıymnyń usynystaryn eskerýge tyrysamyz. Ózderińizge málim, men Qazaqstannyń ekonomıkalyq saıasatyn EYDU-nyń joǵary standarttaryna sáıkestendirý jóninde maqsat qoıdym, – dedi Qasym-Jomart Toqaev.
Memleket basshysy EYDU-men yqpaldastyq ornaǵan ýaqyttan beri Qazaqstan birqatar mańyzdy qujatqa qol qoıǵanyn aıtty. Budan bólek, EYDU-nyń basqa da mindetti quqyqtyq ınstıtýttaryna qosylý jumystary júrgizilip jatyr.
Matıas Korman uıymnyń Azııa elderimen, sonyń ishinde Qazaqstanmen jan-jaqty qarym-qatynasty nyǵaıtýǵa beıildi ekenin rastady.
– Qazaqstan men EYDU arasyndaǵy baılanystar óte jaqsy damyp keledi dep oılaımyn. Bolashaqta bul qatynastardy keńeıtý jáne nyǵaıtý úshin mol áleýet bar. Qazaqstan óz saıasatyn EYDU-nyń standarttary men ozyq tájirıbesine sáıkestendirýge nıetti ekeni qýantady. Sizdiń reformalaryńyzdyń baǵdarlamalaryna kómektesý jáne qoldaý kórsetý úshin bar kúsh-jigerimizdi jumsaýǵa daıynbyz. Biz búginde aldymyzda turǵan kóptegen máseleni sheshý maqsatynda jahandyq yntymaqtastyq deńgeıin kóterýge múddelimiz, – dedi EYDU basshysy.
Qasym-Jomart Toqaev Qazaqstanda Uıymnyń óńirlik keńsesin ashý jumystaryn jalǵastyrý mańyzdy ekenin aıtty. Sondaı-aq EYDU ókilderin aldaǵy Astana halyqaralyq forýmyna qatysýǵa shaqyrdy.
