Prezıdent: Ekinshi, úshinshi AES qurylysyn josparlaýdy qazir bastaý kerek
ASTANA. KAZINFORM — Memleket basshysy Qasym-Jomart Toqaev elimizde ekinshi, tipti úshinshi atom elektr stantsııasynyń qurylysyn qazirden bastap josparlaý kerektigin málim etti.
— Qazir biz qýat kózderin jan-jaqty jańǵyrtyp jatyrmyz. Shetel ınvestorlarynyń qatysýymen aýqymdy jobalar júzege asyp jatyr. Mysaly, aldaǵy bes jylda qýaty 6,3 gıgavatt bolatyn «jasyl» energııa nysandaryn iske qosý josparlanǵan. Bul qadam elimizdegi jasyl energııanyń úlesin edáýir arttyrady. Biraq, Qazaqstannyń túpki maqsaty — qýat kózderin ózgertý emes. Bul — eń aldymen elimizdiń energııa júıesiniń naqty múmkindigi men memleketimizdiń uzaqmerzimdi múddelerine negizdelgen turaqty damý joly, — dedi Qasym-Jomart Toqaev Qazaqstan halqyna Joldaýynda.
Memleket basshysynyń aıtýynsha, ıadrolyq energetıkany damytýǵa bet burýymyzdyń mán-mańyzy aıryqsha.
— Bir aı buryn Almaty oblysynda Qazaqstandaǵy alǵashqy atom elektr stantsııasyna qatysty joba «Rosatommen» birge júzege asyryla bastady. Biraq ekonomıkany turaqty damytý úshin bul jetkiliksiz. Ekinshi, tipti úshinshi atom elektr stantsııasynyń qurylysyn qazirden bastap josparlaı berýimiz kerek. Jaqynda Qytaı Halyq Respýblıkasynyń Tóraǵasy Sı Tszınpınmen ótken kezdesýde elderimizdiń atom salasyndaǵy strategııalyq seriktestigi týraly ýaǵdalastyqqa qol jetkizdik, — dep naqtylady Prezıdent.
Buǵan deıin Qasym-Jomart Toqaev joǵary tehnologııaǵa 1 mlrd dollar ınvestıtsııa tartý týraly baǵdarlamasyn ázirleý qajettigin aıtqan bolatyn.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.