Prezıdent EQDB prezıdenti Odıl Reno-Bassony qabyldady
ASTANA. KAZINFORM — Sheteldik ınvestorlar keńesiniń 38-shi plenarlyq otyrysy aıasynda ótken kezdesýde Qazaqstan men qarjy ınstıtýtynyń taıaý jyldardaǵy yntymaqtastyq perspektıvasy talqylandy. Prezıdent elimizdiń ekonomıkalyq damýyna úles qosqany úshin EQDB basshylyǵyna rızashylyq bildirdi. Bul týraly Aqorda málim etti.
— Bizdi strategııalyq qarym-qatynas baılanystyrady. Qazaqstan — Banktiń negizgi seriktesi sanalatyn memlekettiń biri. Mundaı yntymaqtastyq bizdiń uzaqmerzimdi saıasatymyzǵa saı. Ózara yqpaldastyǵymyz kóptegen jyldan beri tabysty ilgerilep keledi, — dedi Qasym-Jomart Toqaev.
Sońǵy otyz jylda Bank Qazaqstandaǵy 354 jobaǵa 11 mıllıard eýrodan asa ınvestıtsııa quıǵan. Sonyń nátıjesinde elimiz EQDB-nyń aımaqtaǵy iri seriktesteriniń birine aınaldy. Búginde damý ınstıtýty Qazaqstanda jalpy quny 3,1 mıllıard eýrodan asatyn 131 jobany qarjylandyryp otyr. Memleket basshysy Qazaqstan Úkimeti men EQDB arasynda Seriktestik týraly negizdemelik kelisimge qol qoıylǵanyn quptady. Onyń aıasynda elimizdiń ornyqty damýyna úles qosý kózdelgen. Qasym-Jomart Toqaevtyń aıtýynsha, qazirgi ýaqytta Qazaqstan ártaraptandyrylǵan, básekege qabiletti jáne tehnologııalyq turǵydan ozyq ekonomıka qurý maqsatynda órshil reformalardy qolǵa aldy.
Odıl Reno-Basso Qazaqstandaǵy strategııalyq maqsattardy sapaly túrde iske asyrýǵa berik negiz qalaıtyn jaǵymdy ınvestıtsııalyq ahýal men ekonomıkadaǵy qurylymdyq ózgeristerdi oń baǵalady.
— Biz úshin Qazaqstan mańyzdy elderdiń biri sanalady. Bıyl ınvestıtsııalyq belsendilik deńgeıi óte joǵary. Qazirdiń ózinde jalpy somasy 1 mıllıard dollardan asatyn kelisimderge qol qoıyldy. Daıyndalyp jatqan jobalardy esepke alsaq, jyl sońyna deıin ınvestıtsııa kólemi 1,3 mıllıard eýroǵa deıin ulǵaıýy múmkin. Bul Qazaqstanda jumys istegennen beri qol jetkizgen eń joǵary ınvestıtsııalyq kórsetkishimiz bolmaq, — dedi EQDB basshysy.
Odıl Reno-Basso Qazaqstannyń ınfraqurylym, kólik baılanysy, ırrıgatsııa jáne energetıka sektorlaryn damytýǵa aldaǵy ýaqytta da atsalysýǵa ázir ekenin rastady. Bank jeke sektorǵa, shaǵyn jáne orta bızneske qoldaý kórsetýge, sondaı-aq ınvestıtsııalyq jobalardy qarjylandyrýǵa nıetti. Qarjy uıymynyń ınvestıtsııalyq qyzmetindegi basym baǵyttyń biri — asa mańyzdy shıkizat materıaldary. Áńgimelesý barysynda tsıfrlandyrý jáne jasandy ıntellekt salasyndaǵy yntymaqtastyqty jandandyrýǵa basa mán berildi. Eýropalyq qaıta qurý jáne damý banki Qazaqstan ekonomıkasynyń tsıfrlyq transformatsııasyna úles qosý arqyly ınnovatsııalyq ekojúıelerdiń qalyptasýyna qoldaý bildirýge daıyn.
Aıta keteıik, elordada QR Prezıdenti janyndaǵy Sheteldik ınvestorlar keńesiniń 38-otyrysy ótti.
