Prezıdent eki Zańǵa qol qoıdy
ASTANA. KAZINFORM - Qasym-Jomart Toqaev eki birdeı Zańǵa qol qoıdy. Bul týraly Aqordanyń baspasóz qyzmeti habarlady.
Prezıdent «2000 jylǵy 7 shildedegi Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Azamattardyń ózara saparlarynyń sharttary týraly kelisimge ózgerister engizý týraly hattamany ratıfıkatsııalaý týraly» Qazaqstan Respýblıkasynyń Zańyna qol qoıdy.
Zańnyń mátini baspasózde jarııalanady.
Sondaı-aq Memleket basshysy «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Zań bıznes sýbektilerine qatysty memlekettik baqylaý men qadaǵalaý formalaryn retke keltirýge, bıznesti júrgizý jaǵdaılaryn jaqsartýǵa baǵyttalǵan. Naqtyraq aıtqanda, salalyq zańdar deńgeıinde jedel den qoıý sharalaryn qoldaný, tergeý júrgizý tetikteri, baqylaý sýbektisine barmaı profılaktıkalyq baqylaý júrgizý tártibi aıqyndaldy. Birneshe salada bıznesti júrgizý jaǵdaılaryn jaqsartatyn ózgerister men tolyqtyrýlar, sonyń ishinde – balyq sharýashylyǵynda aýyl sharýashylyǵy maqsatyndaǵy perspektıvaly jer ýchaskelerinde balyqty jasandy jolmen ósirý múmkindigin qarastyratyn; – ósimdikter karantınine baılanysty karantınge jatqyzylǵan ónimniń ornyn aýystyrýǵa ákimshilik júktemeni azaıtýdy; (fıtosanıtarııalyq sertıfıkattyń kúshin joıýdy); – ónerkásip salasynda otandyq óńdeý ónerkásibi kásiporyndaryn óz elimizde shyǵatyn shıkizatpen qamtamasyz etýdi: – munaı-gaz salasynda shıki munaıdan qaıta óńdelgen ónimderdiń shyǵý tegin rastaıtyn qujattar tizbesin naqtylaýdy; – qarjy naryǵynda banktermen ózara is-qımyl jasaý kezinde bıznes úshin rásimderdi jeńildetýdi; – zańdy tulǵalardy tirkeý kezinde zańdy tulǵalar men olardyń fılıaldaryn jáne t.b. memlekettik tirkeý/qaıta tirkeý boıynsha memlekettik qyzmetter kórsetýdiń elektrondyq formatyna aýystyrýdy kózdeıtin birqatar túzetý engizildi. Atalǵan sharalar kásipkerlikpen aınalysý úshin qolaıly jaǵdaı týǵyzýǵa, júrgiziletin tekserýlerdiń ashyqtyǵyn, sondaı-aq tutynýshylar, kásipkerlik sýbektileri jáne memleket múddeleri arasyndaǵy teńgerimdi qamtamasyz etýge arnalǵan.
Zańnyń mátini baspasózde jarııalanady.
