Prezıdent «Egmont» qarjylyq barlaý bólimsheleri tobynyń tóraǵasy Eljbeta Frankov-ıAskevıchti qabyldady

ASTANA. KAZINFORM - Kezdesý barysynda aqshany jylystatýǵa jáne terrorızmdi qarjylandyrýǵa qarsy kúres salasyndaǵy halyqaralyq yntymaqtastyqtyń ózekti máseleleri talqylandy, dep habarlaıdy Aqordanyń baspasóz qyzmeti.

Qasym-Jomart Toqaev jahandaǵy qarjylyq qaýipsizdikti nyǵaıtýǵa jáne aktıvterdi qaıtarý tıimdiligin arttyrýǵa úles qosyp júrgen basty halyqaralyq platforma retinde «Egmont» tobynyń mańyzy zor ekenine nazar aýdardy.

Memleket basshysy Qazaqstannyń «aqshany jylystatýǵa qarsy» ulttyq júıesin halyqaralyq standarttarǵa saı odan ári jetildirýge nıetti ekenin rastady.

Prezıdent zań ústemdigin qamtamasyz etip, qoǵamdyq qaýipsizdikti nyǵaıtý maqsatynda «Zań jáne tártip» tujyrymdamasy qabyldanǵanyn jetkizdi.

Eljbeta Frankov-ıAskevıch Qazaqstanda júrgizilip jatqan reformalarǵa joǵary baǵa berip, onyń tıimdiligin atap ótti.

Osyǵan deıin Memleket basshysy Lıýksembýrgtiń Uly Gertsogin quttyqtaǵan bolatyn.