Qazaqstanda efıopııalyq shaı, kofe jáne gúlder haby qurylýy múmkin
NЬıÝ-DELI. KAZINFORM — Prezıdent Efıopııa Premer-mınıstri Abıı Ahmedpen kezdesti, dep habarlaıdy Aqordanyń baspasóz qyzmeti.
Memleket basshysy Qasym-Jomart Toqaev pen Premer-mınıstr Abıı Ahmed kezdesýde ekijaqty qarym-qatynasty damytý perspektıvasyn, atap aıtqanda, saıası dıalogty, saýda-ekonomıkalyq jáne ınvestıtsııalyq yqpaldastyqty jandandyrý máselelerin talqylady.
— Sizdiń elińizge zor qurmetpen qaraımyz. Addıs-Abebadaǵy turaqty túrde qyzmet etetin elshiligimiz Qazaqstannyń Afrıka qurlyǵyndaǵy alǵashqy dıplomatııalyq ókildikteriniń biri boldy. Budan bólek, Qazaqstan Afrıka Odaǵynda baıqaýshy el retinde tanylǵan. Sondyqtan bizdiń Afrıkaǵa degen qyzyǵýshylyǵymyz aıqyn ári ornyqty sıpatqa ıe. Ásirese, Efıopııaǵa kózqarasymyz erekshe. Elderińizben qarym-qatynasty nyǵaıtýǵa múddeli ekenimizdi aıtqym keledi, — dedi Qasym-Jomart Toqaev.
Memleket basshysynyń pikirinshe, ózara saýda-sattyq kólemin ulǵaıtý arqyly iskerlik seriktestikti jandandyrýǵa mol múmkindik bar. Áńgimelesý barysynda taraptar bir-biriniń saýda-ekonomıkalyq jáne ınvestıtsııalyq áleýetimen tanysý, Qazaqstanda Efıopııadan shaı, kofe, sondaı-aq gúl ónimderin jetkizýge arnalǵan hab qurý perspektıvasyn zerdeleý úshin eki eldiń delegatsııalaryn jiberýge ýaǵdalasty.
Buǵan deıin Prezıdent Elena Rybakınany tennısten AQSh Ashyq chempıonatyndaǵy jeńisimen quttyqtaǵanyn jazǵanbyz.
