Prezıdent EAEO elderine JI men robototehnıka salasynda birlesken jobalar jasaýdy usyndy
ASTANA. KAZINFORM – Memleket basshysy Qasym-Jomart Toqaev EAEO elderine jasandy ıntellekt pen robototehnıka salasyndaǵy birlesken jobalardy damytýdy usyndy.
Prezıdent álemdik ekonomıka transformatsııalanyp jatqanyn jáne ósýdiń jańa núktelerin izdeý mańyzdy ekenin atap ótti. Ulttyq ekonomıkalardyń uzaqmerzimdi turaqtylyǵy men olardyń bolashaq álemdik tártiptegi orny jańa tehnologııalyq syn-qaterlerge beıimdelý jyldamdyǵyna tikeleı baılanysty.
– Jasandy ıntellektini damytýǵa baǵyttalǵan tehnologııalyq progress pen jappaı tsıfrlandyrý tolqyndary birinen soń biri kelip jatyr. Árbir jańa tehnologııalyq kezeń kelesi serpiliske negiz qalap, kókjıekten ári asa alatyndar úshin buryn-sońdy bolmaǵan múmkindikter ashady, – dedi Qasym-Jomart Toqaev Astanada ótken Joǵary Eýrazııalyq ekonomıkalyq keńestiń otyrysynda.
Sarapshylardyń baǵalaýynsha, aldaǵy 20 jylda bıotehnologııalar, avtonomdy júıeler, ǵarysh ekonomıkasy, energııany saqtaý jáne kvanttyq esepter sııaqty birqatar mańyzdy tehnologııalyq úrdister aıqyndalady. Atap aıtqanda, uzaqmerzimdi boljamdar 2035 jylǵa qaraı álemdik robototehnıka naryǵynyń kólemi 376 mıllıard dollardan asatynyn kórsetti.
– Al vırtýaldy shyndyq ındýstrııasynda shamamen 700 mıllıard dollar aınalymda bolady. Bizdiń elder árıne, jahandyq úrdisterden shet qalmaýy kerek. Menińshe, Eýrazııalyq ekonomıkalyq komıssııa tájirıbe almasýǵa jáne damýdyń eń perspektıvaly baǵyttary boıynsha birlesken jobalardy júzege asyrýǵa qoldaý kórsetýi qajet, – dedi Qazaqstan Prezıdenti.
Aıta keteıik, Astanada Joǵary Eýrazııalyq ekonomıkalyq keńestiń otyrysy bastaldy. Bul jıynǵa Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan keldi.
Bıyl Qazaqstan Respýblıkasy EAEO organdaryna tóraǵalyq etip otyr. Memleket basshysy Qasym-Jomart Toqaev 2025 jylǵy 31 jeltoqsanda EAEO memleketteri basshylaryna joldaǵan úndeýinde Qazaqstan tóraǵalyǵynyń negizgi basymdyqtaryn aıqyndady.
Olar: jasandy ıntellektini ekonomıkalyq ıntegratsııany damytýdyń jańa quraly retinde damytý, EAEO logıstıkalyq keńistiginiń áleýetin paıdalaný, ónerkásip pen agroónerkásip keshenin tsıfrlandyrý, ózara saýdadaǵy ákimshilik kedergilerdi qysqartý jáne úshinshi eldermen ekonomıkalyq yntymaqtastyqty keńeıtý.
