Prezıdent Dúnıejúzilik shahmat olımpıadasynda ekinshi oryn alǵan qazaqtyń shahmatshy qyzdaryn quttyqtady
ASTANA. KAZINFORM - Memleket basshysy Qasym-Jomart Toqaev Samarqandta ótken Dúnıejúzilik shahmat olımpıadasynda ekinshi oryn alǵan qazaqtyń shahmatshy qyzdaryn quttyqtady, dep habarlaıdy QR Prezıdentiniń keńesshisi – Baspasóz hatshysy Aıbek Smadııar.
Otandastarymyz álemdegi eń myqty, áıgili komanda – Qytaı quramasyna ǵana ese jiberip, úlken nátıje kórsetti.
Prezıdent quttyqtaýynda dańqty shahmatshy Bıbisara Asaýbaeva bastap barǵan Qazaqstan quramasy bedeldi týrnırdiń birde-bir oıynynda jeńilmegenin atap ótti.
Muny shahmat sarapshylary úlken jetistik retinde baǵalap otyr. Sonymen qatar Qasym-Jomart Toqaev bizdiń shahmat sheberleri ótken olımpıadadaǵy tabysty jolyn jalǵastyrǵanyna nazar aýdardy.
-Qazaqstan komandasy sol kezde de ekinshi orynǵa taban tiregen edi. Bul sportshylarymyzdyń deńgeıi bıik, talantty, eńbekqor ekenin, sondaı-aq otanshyldyqty naqty ispen dáleldeı alatynyn kórsetedi. Memleket basshysy shahmatshy arýlarymyzǵa tolaıym tabys, zor densaýlyq jáne baq-bereke tiledi,-delingen habarlamada.
Osyǵan deıin Qazaqstan shahmatshylary Olımpıadada úzdik úshtikke kóterilgeni týraly jazdyq.
