Prezıdent Dúnıejúzilik keden uıymynyń Bas hatshysymen kezdesti
ASTANA. KAZINFORM – Prezıdent Qasym-Jomart Toqaev Aqordada Dúnıejúzilik keden uıymynyń Bas hatshysy Ien Sonderspen kezdesý ótkizdi.
Memleket basshysy Dúnıejúzilik keden uıymymen elimizdegi keden zańnamasyn jetildirý jáne kedendik ákimshilendirý tıimdiligin arttyrýǵa qatysty yntymaqtastyq mańyzdy ról atqaratynyn atap ótti.
Prezıdent Qazaqstan Eýrazııadaǵy kólik qatynasyn nyǵaıtýǵa jáne júk tasymalyna qolaıly jaǵdaı jasaýǵa kóp kúsh-jiger jumsap jatqanyn aıtty. Sondaı-aq «aqyldy shekara» modelin dáıekti túrde damytyp kele jatqanyn, keden rásimderin ońtaılandyrý úshin tsıfrlyq sheshimder keńinen qoldanylatynyn jetkizdi.
Ien Sonders Dúnıejúzilik keden uıymy men Qazaqstan arasyndaǵy qarym-qatynas qarqynyna joǵary baǵa berip, elimiz kedendik ákimshilendirý isin jetildirýde, zamanaýı tsıfrlyq sheshimderdi engizýde jáne tıisti organdardyń ınstıtýtsıonaldyq quzyretin nyǵaıtýda eleýli tabysqa jetkenine toqtaldy.
Prezıdent pen Uıym jetekshisi 30 jyldan asa ýaqyt boıy tabysty ilgerilep kele jatqan ózara tıimdi yntymaqtastyqty odan ári nyǵaıtýǵa beıil ekenin rastady. Budan bólek, álemdik saýdadaǵy syn-qaterler men úderister jaıynda pikir almasyp, saýda-ekonomıkalyq baılanystardy keńeıtý jáne Ortalyq Azııa óńiriniń kólik-logıstıka áleýetin arttyrý perspektıvasyna aıryqsha nazar aýdardy.
Qasym-Jomart Toqaev seriktestik pen dostyq baılanystardy nyǵaıtýǵa qosqan úlesi úshin Dúnıejúzilik keden uıymynyń Bas hatshysy Ien Sondersti II dárejeli «Dostyq» ordenimen marapattady.
Aıta keteıik, Memleket basshysy Soltústik Makedonııa prezıdentin Táýelsizdik kúnimen quttyqtady.
