Prezıdent: Dostyq pen yntymaqtastyqty eshteńe almastyra almaıdy
ASTANA. KAZINFORM — Yntymaqtastyq ustanymyn jalǵastyrý memleketterdiń qazirgi jáne keleshek basshylarynyń qasıetti mindeti. Bul jóninde Qasym-Jomart Toqaev Vladımır Pýtınmen bolǵan kelissózderden keıingi BAQ ókilderine arnalǵan brıfıngte málimdedi.
— Kórnekti memleket qaıratkeri jáne álemdik aýqymdaǵy saıasatker retinde Siz uly derjava sanalatyn Reseıdiń mártebesin nyǵaıtý jolynda dáıekti saıasat júrgizip kelesiz. Reseı tikeleı aralaspasa, birde bir iri jáne eleýli halyqaralyq másele sheshimin tappaıdy. Siz jahandyq tártip túbegeıli ózgerip jatqan qıyn kezeńde el basqaryp, orys halqy men Reseı memlekettiligi úshin taǵdyrsheshti mánge ıe mıssııany abyroımen jáne laıyqty deńgeıde atqaryp kelesiz. Qazaqstan Reseı ekonomıkasynyń damýyna jáne halyqaralyq arenada tabysqa jetýine shyn máninde tilektes. Bizdiń memleketterimiz alyp Eýrazııa keńistiginiń negizin quraıdy. Berik ári birtutas Eýrazııa qaýipsizdigin saqtaý úshin birlese jumys atqaryp jatyrmyz. Eki eldi tarıhı tamyrlastyq, mádenı dástúrler, uqsas mentalıtet, bastysy, álemdegi eń uzyn shekara biriktiredi. Sondyqtan máńgi dostyq, tatý kórshilik jáne ózara senim degenimiz — jaı ǵana úgit-nasıhat urany emes, halyqtarymyzdyń beıbit tirshiliginiń máni jáne qoǵamdyq ómirdiń barlyq salasyndaǵy tabystyń myzǵymas kepili. Biz Qazaqstanda muny jaqsy túsinemiz jáne Reseımen jan-jaqty yntymaqtastyqty basty baǵyt retinde qarastyramyz. Sonymen qatar bul isti jalǵastyrý elderimizdiń qazirgi jáne keleshek basshylarynyń qasıetti mindeti dep sanaımyz. Óıtkeni eki eldiń dostyǵy men yntymaǵyn eshteńe almastyra almaıdy, — dedi Prezıdent.
Aıta keteıik, buǵan deıin Prezıdent Baıqońyr — Qazaqstan men Reseı áriptesteginiń jarqyn sımvoly ekenin aıtty.
