Prezıdent Donald Trampty «Artemıda-2» mıssııasynyń tabysty oryndalýymen quttyqtady
ASTANA. KAZINFORM — Qasym-Jomart Toqaev Donald Trampty «Artemıda-2» mıssııasynyń tabysty oryndalýymen quttyqtady. Bul týraly Aqordanyń baspasóz qyzmeti málim etti.
— Memleket basshysy «Artemıda-2» mıssııasynyń sátti aıaqtalýyna oraı AQSh Prezıdentine quttyqtaý hatyn joldap, adamzattyń keıingi jarty ǵasyrdaǵy Aıǵa jasaǵan alǵashqy sapary ǵaryshty ıgerýde tarıhı kezeńge aınalǵanyn atap ótti. Prezıdent AQSh-tyń ozyq ǵylymı jetistikterine joǵary baǵa berdi. Bul dúnıe júzindegi ǵalymdardyń, ınjenerler men zertteýshilerdiń jańa býynyn jigerlendirip, bilim kókjıegin keńeıtetinin aıtty. Qasym-Jomart Toqaev Donald Trampqa «Artemıda» baǵdarlamasyn jáne ǵarysh salasyndaǵy basqa da bastamalardy iske asyrýda tabys tiledi, — delingen habarlamada.
Eske sala keteıik, NASA-nyń «Artemıda-2» mıssııasy aıasynda Aıdy aınalyp ushqan «Orıon» ǵarysh kemesi Kalıfornııa jaǵalaýy mańyndaǵy Tynyq muhıtyna sátti qondy. Qoný sátiniń tikeleı efırin NASA-nyń YouTube arnasynda úsh mıllıonnan astam adam tamashalady.
