Prezıdent: Digital Qazaqstan halyq múddesine qyzmet etetin qujat bolýǵa tıis
ASTANA. KAZINFORM – Aqordada Prezıdent Qasym-Jomart Toqaevtyń tóraǵalyǵymen Digital Qazaqstan jobasynyń júzege asyrylýy jóninde jumys keńesi ótti. Bul týraly Aqordanyń baspasóz qyzmeti habarlady.
Degenmen shuǵyl sheshimin tabýǵa tıis birqatar másele de bar.
– Memlekettik apparat qyzmetin tsıfrlandyrýdy jedeldetý qajet. Qazirgi kezde memlekettik qyzmettiń 90 paıyzdan astamy onlaın formatqa aýystyrylǵan. Vedomstvoaralyq aqparat júıeleri birizdendirilgen úderiske kiriktirilmegen. Jedeldik pen sapa barlyq kezeńde basymdyqqa aınalýǵa tıis. Buǵan deıin aıtqanymdaı, adamdardy júgirtip, áýre-sarsańǵa salmaı, derekterdi barynsha qoljetimdi etken jón, – dedi Memleket basshysy.
Qasym-Jomart Toqaevtyń paıymdaýynsha, Digital Qazaqstan strategııasynda qaǵazbastylyqtan arylyp, ishki protsesterdi túbegeıli qaıta qurýǵa basa mán berý qajet.
– Tsıfrlandyrý men bıýrokratııa ot pen sý sııaqty bir birine kereǵar qubylystar. Biz zamanaýı tehnologııalardy eskirgen bıýrokratııanyń tar sheńberine qamaýǵa tyryspaı, jańasha jumys istep úırenýimiz kerek. Zamanaýı tsıfrlyq memleket jasandy ıntellektige beıimdelýge jáne aýqymdy derekter qoryn ońtaıly paıdalanýǵa mindetti. Osynaý jańa ári kúrdeli salanyń mamany – sizder. Qaıtkende de, solaı atalasyzdar. Endeshe ne turys? Bizge nátıje kerek. Jasandy ıntellekt týraly jańalyqtardy únemi oqyp otyramyn. Tehnologııanyń qarqyndy damyp kele jatqany sonshalyq, Qazaqstannyń tsıfrlyq keleshegine alańdaı bastaısyń. Menińshe, protsess óte baıaý júrip jatyr, – dedi Memleket basshysy.
Prezıdent Úkimetke memlekettik apparatty túbegeıli transformatsııalaý mindetin júktedi. Bul isti úılestirýmen Jasandy ıntellekt jáne tsıfrlyq damý mınıstrligi aınalysady. Qasym-Jomart Toqaev vedomstvo jyl sońyna deıin ózgelerge úlgi kórsetip, azamattarmen, bıznespen jáne memlekettik organdarmen qarym-qatynastyń jańa formatyna birinshi bolyp aýysýy kerek ekenin atap ótti. Prezıdent AI-Sana baǵdarlamasyn odan ári damyta otyryp, naqty nátıjelerge qol jetkizýdi tapsyrdy.
Aıta ketelik Qasym-Jomart Toqaev memlekettik qurylymdar jasandy ıntellekt jáne tsıfrlandyrý jyly aıasynda aýqymdy jumys isteýi qajet ekenine nazar aýdardy.
