Prezıdent: Dertti emdeýdiń neshe túrli joldaryn kórsetip, adamdardyń densaýlyǵyna qaýip tóndirýge bolmaıdy
NUR-SULTAN. QazAqparat - Dertti emdeýdiń neshe túrli joldaryn kórsetip, adamdardyń densaýlyǵyna qaýip tóndirýge bolmaıdy. Bul týraly respýblıkalyq telearnalar arqyly elimizde qalyptasqan ahýalǵa baılanysty úndeý jasaǵan QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Osyndaı kúrdeli jaǵdaı kezinde el arasynda kóptegen jalǵan áńgimeler taraýda. Teris aqparat taratyp júrgen aram pıǵyldy adamdardyń áreketteri oryn alýda. Ókinishke qaraı, keıbir azamattar jalǵan aqparatqa senetin boldy. Sonymen qatar, taǵy bir mańyzdy másele. Dárigerlerimiz buqaralyq aqparat quraldary arqyly azamattarǵa naqty, birizdi málimet berýi kerek. Dertti emdeýdiń neshe túrli joldaryn kórsetip, adamdardyń densaýlyǵyna qaýip tóndirýge bolmaıdy. Bundaı áreketterge tosqaýyl qoıý kerek», - dedi Qasym-Jomat Toqaev.
Memleket basshysy Qylmystyq kodekstiń 174-babyna sáıkes jalǵan aqparat taratqan adam jaýapqa tartylatyndyǵyn eskertti.
«Quqyq qorǵaý organdary el ishindegi osyndaı jónsizdikke qatysty qatań sharalar qoldanatyn bolady. Sol sııaqty dári-dármektiń baǵasyn birneshe ese ósirip, qalyptasqan jaǵdaıdy óz maqsatyna paıdalanǵysy kelgen alypsatarlardy da quqyq qorǵaý organdary meniń tapsyrmama sáıkes jaýapqa tarta bastady. Qazir memlekettik organdar eldi mekenderdi qajetti dári dármekpen tolyq qamtamasyz etýde. Osyǵan oraı, tıisti qor jasaqtalǵan. Tósek oryndary da, medıtsınalyq qyzmet kórsetý isi de tolyǵymen qamtamasyz etiledi», - dedi QR Prezıdenti.
