Prezıdent: depýtattardyń birqatary Quryltaıǵa ótip, el ıgiligi jolynda eńbek ete beredi dep oılaımyn
ASTANA. KAZINFORM — Halyq reformalardyń qanshalyqty nátıjeli bolǵanyn Quryltaıdyń qyzmetine qarap baǵalaıdy. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev málim etti.
— Quryltaı — jańa turpatty Qazaqstannyń mańyzdy sımvoly. Sondyqtan onyń quramyna naǵyz otanshyl, bastamashyl ári memleketshil tulǵalar, ıaǵnı tek úzdikter ǵana kirýi kerek. Sebebi halyq reformalardyń qanshalyqty nátıjeli bolǵanyn dál osy Quryltaıdyń qyzmetine qarap baǵalaıdy, — dedi Qasym-Jomart Toqaev.
Prezıdent osyndaı mańyzdy sátte taǵy bir márte Senat pen Májilistiń basshylyǵyna jáne depýtattaryna shynaıy rızashylyǵyn bildirdi.
— Sebebi sizder memleketimizdiń ıgiligi úshin adal ári qajyrly eńbek ettińizder. Jurttyń muń-muqtajyn batyl kóterip, ult múddesin bárinen bıik qoıa bildińizder. Jańa kezeń — jańa múmkindikter ýaqyty. Depýtattardyń birqatary Quryltaıǵa ótip, el ıgiligi jolynda eńbek ete beredi dep oılaımyn. Qazaqstan Halyq Keńesinde de ózderińiz sekildi bilikti azamattar bolýy kerek dep sanaımyn, — dedi Memleket basshysy.
Buǵan deıin habarlanǵandaı, búgin elordada Parlament palatalarynyń birlesken otyrysynda Prezıdent Qasym-Jomart Toqaev Quryltaıdyń aldynda qandaı mindet turǵanyn atady.
